高海寧思縮搬細屋

密密谷胸搵銀的高海寧為養家而慳到盡，遷離月租兩萬多元的何文田寓所，搬往月租約萬元的旺角舊樓。日前她離開旺角居所時，更頭耷耷免被認出。

高海寧經常大騷34D巨咪搵真銀，但她為了養家而要慳到盡，加上最近其父親涉及官非，難怪她大呻負擔重兼開支大。而近日本報更發現她為了減少開支，竟「降呢」大屋搬細屋，由原本月租約兩萬多元，面積約九百呎的何文田寓所，搬往旺角奶路臣街的舊樓，該單位的面積約五百呎，月租只需約一萬元，但該處人流複雜，高海寧出入亦需格外小心。日前高海寧在九龍灣工作後，驅車與男友人返回旺角寓所，並逗留約一小時後獨自離開，見她打扮隨意，戴上帽及粗框眼鏡，步出大廈時左顧右盼。不欲被人認出的她全程頭耷耷，步行往太子方向，期間她發現記者在場，即一臉愕然地急步躲入附近大廈。

行街齋睇唔買

此外，較早前高海寧在將軍澳工作後，與公司同事到附近餐廳醫肚及閒逛，但慳家的她卻齋睇唔買，之後才驅車返回旺角寓所。另一邊廂，她昨日出席動漫節活動時，直認由何文田搬往旺角，問到是否因慳錢而貴屋搬平屋，她笑說：「搬屋呢啲嘢唔係我決定，係屋企人嘅意思。（怕唔怕旺角區太雜？）唔驚，其實我唔介意畀記者跟，但真係唔想周圍講住邊。成日都有人喺樓下等，我嗰度保安又唔係特別好。」