傅嘉莉捱出頭

年前拍攝首部電影後轉任模特兒的傅嘉莉（Kelly），近日重登大銀幕，自言性格文靜的她坦言在娛樂圈難以自處：「呢幾次出席公開活動，返到屋企都覺得好唔慣，不知所措，我知名度唔高，做訪問唔需要我。我就同自己講要慢慢儲落去，做好演員本分先。」

承認被寵壞

Kelly要獨自面對陌生環境，因為連其家人亦曾不予支持：「屋企人冇反對我做模特兒，但就反對我拍電影，爹哋覺得我諗嘢太天真，而佢知呢個世界唔簡單，怕我撞板，但見到一直有機會嚟，佢哋就擔心會阻礙我，所以我要努力做出成績，畀信心佢哋。」

轉型為演員的她難以適應藝人生涯，或多或少是因為在模界被「寵壞」：「模界同娛圈係兩極，模特兒收到時間地點做嘢，做完就走，唔使對傳媒。最近拍番戲，初頭做宣傳好唔慣，見到成班藝人同傳媒好熟，自己就啱啱開始。做模特兒畀人遷就慣，好似公主咁，拍攝時所有人都圍住你，你企正喺中間，化妝整頭嘅人又錫住你，依家就唔同。」她擅長拍硬照，偏偏影相成為其致命傷，大合照時因不懂攝位而被淹沒：「喺一大堆人之中我會讓，側身縮入去，公司睇到都問我點解會企到見我唔到。」

嘲o靚模露點

雖然Kelly正式入行已有5年，但她自嘲在娛圈零知名度，距離成功甚遠：「人哋叫得出個名先算成功。」正如前輩所言，缺乏關注是最辛苦的階段，但她從未想過放棄：「Never Give Up！做任何一行，都係要捱過先算成功！依家多啲走出嚟，令人有印象好重要，畀時間人哋認識我，同時畀我認識人。」

o靚模為彈出無所不用其極，博上位招數已突破性感界線，甚至搏命至露點，Kelly對她們又敬又畏：「佩服佢哋用是非同性感上位，真係要放低一啲嘢先做到。我就唔得，我着件性感衫，都要着束衣保護，搞到呼吸困難。至於露點實在太激動，藝人要保持形象，性感可以靚，露出三級部位就唔好。」

後記：虛心學習存感激

Kelly在首部新片《人約離婚後》上映後自言打破框框，不再只是廣告中的模特兒：「多謝葉念琛導演，佢好高要求，一唔得就當住所有人鬧我。都有沮喪，但拍咗效果唔好仲衰啦！」在模界打滾多年仍肯以新人自居，相比急於上位而出奇招的模特兒，她更得人心。