馬賽向上爬

港姐出身的馬賽才貌雙全，在模界多年的傅嘉莉（Kelly）美貌亦毋庸置疑，但家人卻反對她們入行，馬賽被批外表不出眾，Kelly則思想天真，但二人仍決心在演藝事業闖出康莊大道。

港姐出身的無綫小花馬賽舉止斯文大方，凡事追求低調，不慍不火，看上去跟「娛樂」這個圈子格格不入，就連她的家人都對其演藝之路抱懷疑態度：「我家人比較鍾意踏實嘅嘢，做演員唔現實，我唔高大、外表又唔夠出眾，佢哋覺得一個好好嘅演員要好似王祖賢、林青霞咁先會見到未來，所以唔太主張我入呢行，而且收入同埋生活都唔係咁穩定。」

拒譁眾取寵

後來家人建議她先做幕後，認為若真的適合當演員，就算做幕後都有機會，故她選擇入讀香港浸會大學主修電影：「讀讀吓發覺真係好愛呢行，兩日要睇三套戲，做演員嘅決心愈嚟愈大。」參選港姐奪得季軍後，順理成章加入無綫，一路走平穩低調路線的她忽然爆出跟吳卓羲緋聞，再次觸發家人的神經：「入行後家人對我做演員意見中立，但一知我有緋聞就好抗拒，因為入行三年都未真正有成績，好多劇都未出，睇唔到任何嘢，人工低要靠家人Back Up，日夜顛倒，捱得好辛苦，生活習慣唔健康，同家人好唔同。」

面對重重壓力，馬賽堅持照自己步伐向上爬，視花旦佘詩曼及楊怡為奮鬥目標：「希望好似佢哋兩個演技穩定咁上，唔靠譁眾取寵，我唔排除行性感路線都係好演員，但我唔想靠呢啲嘢吸引人先，名氣來得快去得快。」每次拍劇前，她都會提早一個月做功課，之前為準備拍攝《洪武三十二》，她狂煲歷史劇及刨有關明朝的書，拍劇時又會寫日記，記低角色的心理歷程：「我都會寫低邊個教咗我啲咩，前輩、監製袋錢入我袋，係好寶貴嘅嘢，依家已經寫咗好厚嘅兩本『天書』！」

再拚搏3年

不靠「事業線」上位的她亦尊重其他靠性感上位的女星，因為人各有志，她們靠天賦本錢突圍亦無傷大雅：「每個人有唔同方向，有啲人行性感路線好快上位，我唔係想搵快錢，係想踏實咁做演員，不過角色要性感就冇問題，之前拍《洪武三十二》都有場強暴戲。」目前為止，她已拍了六套電視劇，但只有兩套出街，暫時仍未清楚觀眾對其演技的評價，她為自己訂下「3年之約」：「我會拚搏多3年，因為好多拍落嘅劇都未出街，到時如果觀眾反應唔好，會讀番書同考慮做幕後，努力咗咁多年，唔得可以做其他嘢，一個女仔青春好少，始終都要結婚生仔。」

後記：家「宅」千日好

不用工作時，馬賽愛獨個兒留在家中睇碟上網，宅女性格的她就算出街睇戲都單拖上陣：「平時做嘢咁忙，有時間我就會做啲吸收『心理力量』嘅嘢，有時自己去戲院或者喺咖啡店坐成日搵創作靈感，又試過特登搭地鐵，留意吓周圍啲人做緊乜！」