宣萱狠飛獸醫男友

近年頻傳婚訊的宣萱與獸醫男友Ruan Bester，拍拖兩年予人打風都打唔甩之感，周前二人才甜蜜地睇李克勤演唱會，怎料宣萱昨日向本報表示已分手！

四十歲的宣萱，09年底遇上年輕四年的外籍男友Ruan，因志趣相投，感情發展一日千里，今年四月曾傳她斥資千萬買愛巢於明年結婚，周前二人更拍拖睇李克勤演唱會，怎料恨嫁的她今周卻因價值觀問題撇男友，未知是否因逼婚不遂而分手。據知，宣萱與男友Ruan多次就結婚問題出現意見分歧，以致價值觀不一致，逼婚不遂的宣萱不想再荒廢女人寶貴的歲月，惟有忍痛斬纜。

價值觀唔同

宣萱昨日接受電話訪問時表現平淡，未因情變而哭哭啼啼，稱與男友分手並非一日之事：「我已經用咗兩年時間去觀察，發覺兩人個價值觀好唔同，既然唔Work就唔再一齊！（唔開心？）唔開心一定有，人大咗，分手唔係晴天霹靂嘅事，我同佢仲係朋友。（會效法莫文蔚重遇初戀男友而結婚？）係咩？真係咁？幾好喎！其實我第一個男友已經結咗婚生咗小朋友，仲生活得好開心！（身邊有冇追求者？）冇呀！感情嘅嘢隨緣啦！我已經交畀個天安排，要嚟就嚟！我啱啱喺新加坡拍完劇返港，都想見吓班朋友先！」