趙碩之3年蛻變 脫得合時

三年前，她為別人而露，三年後，她為自己而露，再涉足寫真戰，Tomboy式性感獲外界好評，她感嘆完美又榮幸！趙碩之坦言從前以為聽話肯露便是乖女，但今年23歲的她思想成熟得多，要影寫真、騷事業線，除非她首肯，否則亮刀架頸也逼不來！

身為「寫真始祖」的趙碩之事隔三年再出寫真，不負一眾粉絲期望，一頭橙髮Tomboy造型卻流露遮掩不了的性感，令宅男沉浸在噴鼻血的興奮中！問到寫真戰後感，碩之表示不當書展是戰場：「我唔覺係比賽，咁樣太短視，書展後寫真先會喺書報攤賣，會繼續宣傳，去馬來西亞同其他國家，所以書展完唔係結束。三年前我仲係新入行，完咗書展就覺完咗個Party咁，今年感覺好唔同，比較實在。」比起處女寫真，這次幕後團隊精英雲集，加上強勁包裝，她亦自覺「好完美」：「今年其他作品唔少，但真係入得眼嘅唔係咁多本，外界以睇寫真眼光審美都讚，好榮幸！」

當初跟風行性感

三年寒暑，令碩之領悟到性感的真正定義，她坦言當年行性感只是盲從風氣，未想過「為乜而露」：「外界風氣只要少布、賣肉就係性感，就會彈出，依家諗番覺得蠢，當時我以為聽公司話騷事業線就係乖。依家唔係咁睇，唔係露就係性感，要露得合時。」但碩之否認當時被要求影寫真感覺難受：「冇唔舒服，嗰時拍完《四葉草》影，當係留個紀錄晒青春，冇乜挑戰同難度。始終每個人只有一個20歲，嗰本寫真好珍貴，冇嘢取代到，會一世留念。」

總結三年蛻變，是碩之再出寫真的原因：「其實寫真無時無刻都出到，只要有人投資，我嘅中性一面之前冇流露到出嚟，今年係好時機去畀人睇到自己呢一面，等人知道我除咗身材以外，都可以騷到女性美同溫和嘅一面。」她以「冇得彈」形容三年的轉變及經歷：「生活咗23年，我不斷進步同成熟，依家生活好精彩，亦變得更珍惜每一樣嘢。」碩之不排除再出寫真，但強調自己一定要有新經歷才會考慮，絕不貿貿然為脫而脫。

不再主動撩交嗌

碩之出道至今是非不絕，早年與同門師妹尹蓁晞鬧不和、與陳偉霆合作電影直斥對方(目及)胸、勁插周秀娜09年寫真「刷牙照」似日本色情文化，而今年她拍亞視劇時被指扮大牌、在寫真戰中又與寸嘴Jeana樹敵。是非遇得多，碩之的態度亦由抗拒變成放棄深究：「以前通常硬碰硬，人哋出聲，自己咪出聲囉！但人大咗比較放鬆唔太在意，只要佢哋唔係傷到自己就得。之前畀人攻擊，唔多唔少影響到心情，搞到自己唔開心！依家唔會，最緊要一切以快樂為主。」她自言現在做人成熟得多，不會主動攻擊撩交嗌，但問到日前又與陳靜聯手夾擊Jeana，笑對方寫真只值一蚊太Cheap？碩之從容地說：「咁冇理由唔答記者朋友嘛，佢哋問Jeana話你乜乜乜喎，我覺得可以禮貌回應，呢啲都係市場需要，我自覺回應得幾圓滑、幾叻女吖！」

碩之現忙於拍攝亞視劇《親密損友》，模特兒出身的她坦言有意轉型當全能藝人，拍劇經驗不多的她，近年不停煲劇睇戲惡補演技：「依家比較鍾意做戲，我會留意電影同劇集入面嘅唔同角色，揣摩吓如果係自己去演要點樣投入，得着好多！」

後記：舞劍扮武士

當日碩之在不同場景前拍攝型格性感照，其中一個造型要她手執光管作道具，她拿起光管當劍般左甩右甩舞個不停，當正自己是《星球大戰》女武士一樣，更調皮地不停開關光管自娛一番。攝影師忙於影相，她則忙於舞劍，樂在其中！