周柏豪矢志鑽戒求婚

周柏豪認為女人天生愛鑽石，故將來求婚必定送上鑽戒冧女友。日前他獲邀率先欣賞英國名珠寶設計師Shaun Leane的展品，自言平時拎蛋撻都整爛的他，一臉緊張她捧起逾千萬港元鑽石手套！

潮人代表周柏豪自言對愛情抱傳統觀念，認同鑽石是女人的星星的說法：「係女人都鍾意鑽石，好似男人鍾意車咁。自己都鍾意鑽石，雖然冇乜研究，但將來求婚一定要有鑽戒！可能係父母影響，佢哋嘅定情信物都係鑽戒。」他笑言幸好交往過的女友都未有要求收鑽石，否則頭痕至極。柏豪自爆曾買鑽石給媽咪，卻蝦碌收場：「有年母親節買咗對鑽石耳環送畀媽咪，先發現原來佢冇穿耳窿！」

恨設計自家品牌

英國名珠寶設計師Shaun Leane多件作品將在香港展出，日前柏豪就獲邀搶先欣賞兼與展品貼身接觸，親手拿起逾千萬港元的鑽石手套：「我不嬲論盡，拎蛋糕或者蛋撻都會整爛，所以頭先超小心。」除手套外，他特別欣賞Leane與Alexander McQueen合作設計的羽毛鷹頭頭飾：「睇到呢件藝術品幾震撼，好巧奪天工！啲羽毛幾襯我個頭，好飄啊！」他表示有意創立個人首飾品牌，兼任設計師及模特兒。