朱紫嬈苦練樂器Sell全能
女歌手朱紫嬈（Khloe）加盟新唱片公司後獲力捧，除出新碟外，還將於八月四日假九展舉行處女演唱會，她說：「因為係我第一個賣飛演唱會，都擔心冇人支持，好彩喺開賣頭幾日，公司同事同我講啲飛賣晒先放心。」由於演唱會的樂手翌日要離港工作，因此Khloe個唱加場的機會不大：「如果加場會幾麻煩，因為要搵人頂替，時間太趕應該做唔到。」
為了以最佳狀態示人，日前Khloe到Band房苦練打鼓、結他及鋼琴，希望屆時以全能歌手姿態示人，她自爆：「其實我唔係好識打鼓，都係臨時學，如果學得唔好就未必打鼓。」Khloe稱沒有邀請前唱片公司歌手做嘉賓，至於曾合唱的蘇永康也因檔期問題未能出席，但她透露已請得好友啤梨（葉文輝）擔任特別嘉賓。Khloe自爆是金飾代言人，故獲金店贊助逾六位數字的金飾，個唱上定必金光閃閃，她自言：「希望星途好似金飾咁璀璨。」
朱紫嬈為即將舉行的演唱會苦練打鼓、結他及鋼琴，望能令觀眾眼前一亮！