Crystal@HotCha學獨立等Regen強勢回歸

HotCha成立了四年，三位成員Crystal、Regen及Winkie因日夜相對而情同姊妹，Crystal坦言得知Regen離隊後曾因不捨而痛哭，又表示自己心直口快，要幫Regen守這個「不能說的秘密」感到辛苦。

張紋嘉（Crystal）接受專訪時表示，早在大半年前已得知Regen有意出外升學：「佢（Regen）親口同我講，我聽到都忍唔住喊，但未致於三個女仔抱頭痛哭咁嚴重。」她又說因種種原因，Regen的升學計劃要保密，但自感是直腸直肚之人，故常擔心因不慎而漏口風，現Regen親身在微博公布，令她鬆一口氣，她說：「終於唔使再擔心洩露Regen秘密啦！」

Crystal表示支持Regen決定，因讀書、增值自己是好事，但另方面又不捨得這位並肩作戰了四年的好友，並透露Regen是典型處女座，決定了就不會改變，故也不會強留Regen：「不過我真係好唔慣冇咗佢，頭先一個人坐保母車，覺得冇咗佢哋會好靜，好唔慣。」

望傳媒體諒

有傳Crystal將單飛發展？她說一切聽從公司安排，又指以前太依賴Regen及Winkie，每次訪問都將回應的重任交給她們，她覺得現時要成熟及學習照顧自己，故她會努力學習面對傳媒，但因腦筋不及Regen及Winkie快，所以她着傳媒要忍耐。

問她Regen即將離開會否影響HotCha工作？Crystal說相信影響不大，因為Regen會完成手頭上所有工作才走，她說：「佢會做埋八月嘅新碟宣傳。（係咪HotCha最後一張唱片？）暫時係。」Crystal強調Regen定會「回歸」，只是未知何時，但她相信將來三人再合體，歌迷仍然支持HotCha。