古仔辭演新片休養數月

前日凌晨在家中跌傷腳的古天樂，昨日到醫院照X光，發現十字韌帶嚴重撕裂，令他擔心身體不勝負荷，遂向電影公司提出辭演新片！

向來拍戲唔錫身的古天樂（古仔），去年因拍攝電影《倩女幽魂》不慎弄傷右腳，導致十字韌帶撕裂！經過多個月治療及手術後，古仔最近再度「動起來」，為下月開拍的新戲《一門忠烈之楊家將》練習騎術。不過，黑開有條路，古仔前日凌晨在家中因踩錯拖鞋尾跌落樓梯，令舊患傷上加傷！惟因早已簽約，故前晚仍撐拐杖到廣州出席活動，更因而遭粉絲發現及在網上瘋傳，「被迫」公開傷勢！

黃百鳴：最緊要冇事

完成活動後，古仔急急返港睇醫生及照X光，結果顯示其十字韌帶再度嚴重撕裂，但因月前才動過手術，故暫不宜再「動刀」，需休息至少3、4個月、每周見醫生及接受物理治療！鑑於傷勢嚴重，他擔心影響新片拍攝進度，遂向電影公司商量辭演。至於老闆黃百鳴坦言擔心古仔傷勢：「套戲仲有5日就開拍，依家不停打緊電話搵人同諗吓有咩適合人選，當然最希望古仔好番！（古仔辭演損失大？）呢啲小事，最緊要佢冇事！」