楊怡羅仲謙黑面「談情」

最近楊怡與羅仲謙拍攝無綫新劇《On Call 36小時》大玩姊弟戀，日前晚上十時許，他們在西貢海邊拍攝談情戲，引來不少街坊圍觀。由於劇情講述二人初時甜蜜談情，繼而嗌大交，楊怡及羅仲謙交足戲，由初時笑笑口突然變得面黑黑，羅仲謙更肉緊得七情上面，咬牙切齒質問楊怡，拍了約半小時完工，離開時楊怡見記者在場，即高舉勝利手勢打招呼。

此外，楊怡昨日接受電話訪問時否認外傳的包養黎諾懿：「有冇搞錯？我何德何能？同佢係好朋友。（發展可能？）將來嘅嘢將來先算。」而黎諾懿昨日拍攝新劇《ATF反恐》時亦否認被包養：「我哋係好朋友，唔係情侶，我成日上佢屋企食飯，同佢媽咪都好熟，好似一家人咁！（你踢拖落樓食早餐？）唔係真！我連住客證都冇，話我哋共用車位，其實係楊怡部車整緊，個位吉咗泊住先。（嚇窒楊怡追求者？）唔會！大家都係單身。（有發展可能？）好難答實！」另外，廣管局昨日接獲15宗投訴楊怡主演的《真相》有粗言污穢語，以及影響警察形象。