陳嘉寶重生

入行時僅17歲的「邦民女」Anjaylia前年組成舊八模搶攻書展寫真戰，其後拆夥與同是舊八模的好友蔡穎恩（Evelyn）拍住搵銀，現在Anjaylia跟不少模一樣轉攻大銀幕，由八個變兩個再單飛，她坦言分別十分大︰「之前一大班人做嘢可以傾偈，分享好多嘢。好似同Evelyn兩個人去做嘢，我唔記得帶嘢，佢會幫我帶，工作嗰陣都會有商有量，梗係開心啦！如果自己一個人要面對好多嘢，咩嘢都要自己搞掂，令自己變得獨立。」

從與拍檔分享到工作壓力一個人承擔，Anjaylia表示起初不太習慣︰「工作環境唔多唔少有啲變化，有好多嘢要去適應，去做嘢係自己一個個體，唔會有人幫到自己，但呢一個係好好嘅機會試更多唔同嘅嘢。」雖然單飛工作，但她仍會與昔日「戰友」保持聯絡，她續說︰「我同Evelyn或者Leanne（何思諺）雖然獨立發展，不過會Keep住聯絡，大家各自做嘢其實都好開心。」

突破少女框架

單飛後Anjaylia更跳出模特兒的框框，以清純形象攻影圈，先後拍過幾部電影，最近在《人約離婚後》中亦佔一角，她說︰「之前拍《婚前試愛》飾演一個學生妹，今次喺《人》片中係一個突破，演一個成熟嘅女強人，仲會結婚生仔！嗰時覺得自己大個咗，好多情緒嘅變化。」Anjaylia直言拍戲令她憧憬結婚︰「好開心戲中有得着婚紗，印象最深刻係有場酒樓結婚戲，自己第一次入新娘房，仲不停喺出面望。」

一講起拍戲，Anjaylia便十分起勁，不過獨立發展的她除了想拍戲外，更希望嘗試更多不同類型的工作，例如在主播界發展，把校園內學到的東西活學活用。問到工作之外的感情生活，會否想抽空去談戀愛？她坦言拍戲時曾勾起一顆恨嫁的心，但終身大事甚至談情說愛都仍需等待︰「結婚同生BB仲有段距離，如果要談情可以同工作談戀愛！屋企人都有問過我幾時拍拖，我叫佢哋放心，總之拍拖同結婚都隨緣啦！」但她笑言不排除會閃婚︰「如果依家出去行街食嘢，見到個男仔係好鍾意，一見鍾情嘅話，我會即刻問佢拎電話，大家夾嘅話可能好快拍拖同結婚！」

不離棄天橋路

現在的Anjaylia到達事業的另一個起步點，由天橋走上大銀幕，她自言喜歡演戲︰「我好鍾意做戲，當然想喺呢方面有好成績，曾經都會諗獎項嘅嘢，有人認同實開心，但都係隨緣，唔可以強求。之前睇完首映覺得好開心同感動，因為有好多人支持，但我唔會捨棄模特兒工作，好開心自己係一個Model，我覺得模特兒工作同拍戲可以並存！」

後記：因模而起

Anjaylia憑「邦民女」一角深入民心，她指這是事業中的一個轉捩點，認為工作機會因此較以前多︰「初時入行都係影吓廣告相，之後多人識會出活動，不過太多人圍住影相，初時唔係好慣，但係好開心，因為多咗人識我。」