呂慧儀‧亂咁露
「太刻意營造性感Tone,加上裙身顏色同膚色太相似,令人感覺露得太多,可以考慮較深顏色。」
高貴指數:●●
諸葛紫岐‧夠搶眼
「絕對表現到佢嘅身形,佢好聰明揀咗銀色做主打,有眼前一亮嘅感覺,露背成為亮眼點,性感又不失高貴。」
高貴指數:●●●●
張馨予‧太肉感
「佢上圍同身形本身好好,可惜今次件晚裝太肉感,可以加番啲布,浪費咗身材,又失咗份高貴。」
高貴指數:●●
陳敏之‧紅得起
「條裙紅色好Sharp、好搶,裙身高衩露腳,若隱若現好有睇頭,個Cutting又騷到敏之高挑嘅身材,加上頸位有配件,令人眼前一亮!」
高貴指數:●●●●●
李亞男‧夠大方
「裙嘅顏色同佢白淨嘅膚色好夾,出嚟嘅效果都好吸引,雖然唔太性感,但感覺大方,可考慮加啲飾物,令頸位冇咁空!」
高貴指數:●●●●
楊梓瑤‧發「老」黃
「有啲普通,算係穩陣嘅選擇,但個黃色出咗事,感覺好舊、好老,有啲過時氣息,令佢膚色睇上去有啲啞色。」
高貴指數:●●●
姚子羚‧最「黐」身
「條裙嘅設計有好多石,好有舞台效果嘅感覺,問題唔大,佢都處理得到,唯一要注意顏色嘅選擇,太似自己膚色就會浪費條裙。」
高貴指數:●●
Alice B.‧名模格
「着呢條裙嘅要求其實幾高,不過Alice Carry得好好,佢身形都好適合着呢類型嘅裙,貼身設計令佢Model嘅身形更突出。」
高貴指數:●●●
Profile
莊思敏(Jacquelin)在模特兒界打滾多年,經常擔任品牌代言人,時裝觸覺敏銳的她,不但躋身名模行列,近年更成功殺入影圈。