美娜美麗有罪
在電影《黑天鵝》中嶄露頭角的女星美娜古妮絲，近日忙於宣傳與Justin Timeberlake合作的新戲，她與前男友麥哥利高堅分手後，一直專心拍戲，工作接踵而來。
記：記者 美：美娜古妮絲
記：新戲《戀搞好朋友》中，你同Justin Timeberlake飾演一對有性關係嘅朋友，你認同角色嘅愛情理論？
美：朋友之間好難存在單純關係，一定會有其中一個人鍾意對方，最後通常收尾都會好肉酸！可能你利用我嚟打發時間，但我可能有少少鍾意咗你，到最後一定會有人受傷。
記：你拍喜劇出身，跟住拍劇情片《黑天鵝》，會唔會覺得女演員好難可以喺靚女同諧星之間取得平衡？
美：我由細到大都唔覺得自己特別靚女，雖然冇人話過我醜樣，但屋企人從冇話過我特別吸引，佢哋只會用性格有咩特別嚟形容我，着重人嘅內心，因為內心唔會咁易改變，相反個樣係會隨時間消逝，一啲都唔重要。
演技易被忽略
記：喺呢行有冇遇過有男藝人認為女喜劇演員啲演技唔好笑？
美：暫時都未試過，但喺呢一行啲人覺得你靚女，就好容易忽略咗其他嘢，淨係覺得你得個樣。雖然冇發生過喺我身上，但啲人真係咁睇人！唔單只發生喺喜劇演員，動作同劇情片都係一樣忽略演員嘅努力。
記：幾時鍾意《星空奇遇記》﹖
美：大約18、19歲開始鍾意，比其他人遲咗鍾意佢哋，不過我依家都好鍾意《星空奇遇記》﹗仲可以由最鍾意開始倒數出成個電視劇系列！
記：鍾意《星空奇遇記》嘅程度有幾誇張？
美：我試過五年前去拉斯維加斯參觀《星空奇遇記》博物館，喺Cafe同一班角色扮演嘅人一齊食嘢、討論吓劇情。
記：你唔好話我知你自己一個人去？
美：梗係唔係啦！有成班朋友陪我o架！我未至於咁「宅」，不過我21歲生日，朋友送咗一張「冼樸」尼莫伊親筆簽名相，我搵咗個相架鑲起佢。
記：平時得閒會做咩？
美：我好鍾意睇電視！星期日一得閒就鍾意匿喺屋企攬住啲狗睇電視真人騷，我已經覺得好開心、好滿足！
記：未來半年有咩新計劃？
美：打算放幾個月大假去旅行，希望會去多啲國家！就算有時放假，都成日掛住睇劇本！