Caroline模堅持

「國產劉心悠」朱裕琳(Caroline)去年初出茅廬已任美容中心代言人,出道僅1年多已推出兩本寫真,近來又獲王晶力捧為「晶女郎」,星途一帆風順!靠的除了是運氣,還有她身為模特兒的一份堅持!

港人對靚女愈來愈多要求,「5呎9吋高、43吋長腿、33D巨咪……」,聽落一連串公式化的完美數字,似乎只會出現在新款美女機械人身上,想不到夢境成真!來自河南的靚女模特兒、組合冬甩成員朱裕琳(Caroline)四肢修長,但竟擁有33D咪咪,加上精緻的五官,天生一副模特兒格!順理成章,她隻身離鄉追尋模特兒夢,入讀廣州體育學院,主修模特兒課程,4年的訓練,足以令她練得周身刀,行貓步、擺甫士都輕而易舉,跟時下只懂發明星夢的嫩模相比,她的夢來得既真且實!

早前Caroline獲王晶賞識,欽點參與電影《猛男滾死隊》,在戲中跟王晶演一對,原來王晶看完她的寫真後,主動安排見面:「佢睇完覺得我好適合個角色,佢安排咗好多次見面,點知有好多波折次次都唔成功,最後見咗一次佢就決定用我!」她只懂用幸運來形容際遇:「好多人入咗行好多年都未必有咁嘅機會,我細細個就有睇佢啲戲,覺得佢好有才華,可以同佢扮演情侶都好開心!」王晶即將有幾套戲都想讓她參與,她表示角色及劇本最緊要,而路線亦不能過激。

為了靚靚 絕食4日

Caroline剛來港發展就贏得「國產劉心悠」稱號,更成功揮低曾人氣爆燈的尹蓁晞(Yumi),接棒成為美容中心代言人,全靠其健康形象,她說:「我都好鍾意劉心悠,佢笑得好甜又白淨,做模特兒、拍戲又得,我都好想好似佢咁!」已拍了兩次寫真的她,慶幸有機會參與湊熱鬧:「好彩趕得切寫真潮參與呢件事,今年影寫真我都有畀意見,希望可以自然啲,表現比之前駕輕就熟!」

雖然上天賜予完美身材,不過Caroline坦言要Keep住副「偈」有相當難度,平日飲食盡量清淡,每日都要做運動,而影寫真或拍廣告期間更要絕食!她慨嘆:「試過有4日冇食過嘢,只食營養劑,到咗第3、4日直情行唔到,出唔到門口!不過唔頂住就會前功盡廢,嗰次減到7、8磅!」這副模特兒身材當真得來不易,亦看出她的一份堅持!

情傾港男 高大細心

在香港獨居的Caroline不時都會思鄉病發作,懷念媽咪整的家鄉小菜,她有時會向公司請假返河南陪家人。不過,經常在港Shopping的她已變成地頭蟲,充當親友導遊絕對不成問題!跟一眾事業心強的女性一樣,她暫時未有意拍拖,但就公開偏愛港男:「我鍾意男人有上進心、唔花心,呢類男仔好難搵!個男仔要高過我,香港男仔有風度啲,內地男仔就大男人啲!」在港「搵食」多年,她大讚港男細心,不過拍拖還是要等緣分。

咬木塞練語

曾在廣州生活的Caroline,至今講廣東話仍是「半桶水」,為了令在港發展更如魚得水,她用盡奇招糾正讀音:「睇港產片係最基本,最近有人教咬木塞讀報紙,原來都幾辛苦,不過為咗讀好啲都冇計!」她跟冬甩成員經常用廣東話及普通話溝通,因為冬甩成員都靠跟她傾偈來練普通話。

韋芷茵

Caroline美貌與身材並重,加上肯搏肯捱,上位指日可待。

Caroline身材高挑,一副模特兒骨格,甚有女神Feel。

朱裕琳大讚香港男生細心,比內地男生更體貼。

朱裕琳(後排中)獲王晶(前排中)欽點參演《猛男滾死隊》,與周秀娜(後排左二)及楊梓瑤(後排左一)鬥戲。