周柏豪熱血「籃」兒瞄準紅館

唱作歌手周柏豪入行四年首度舉行個人音樂會，總算向紅館的目標踏出第一步。同樣是籃球場的熱血分子，柏豪毫不猶豫表示工作第一，寧可犧牲休息時間亦要發展籃球興趣，認真、投入便是他的成功要訣。

柏豪日前舉行一場MOOV Live音樂會，是入行四年來的首次，他笑言經常擔任演唱會嘉賓，但從未擁有屬於個人的音樂會，今次夢想成真之餘，更成為他將來的「踏腳石」：「之前一直都覺得自己未夠歌、未夠能力去開音樂會，心理上好猶豫！經歷過呢幾年時間，見到自己慢慢開始有成績，賣碟都愈來愈好，信心會強好多，希望以紅館為最終目標，慢慢一步一步去更大場地開騷！」

含淚答謝家人

柏豪在今次的音樂會上，大唱新碟《本体分裂》的歌曲，其中更分別向歌迷及家人送上《後援》及《想太多》，令氣氛非常感動，他說：「《想太多》呢隻歌係寫畀我屋企人，好想多謝佢哋一路以嚟無限量咁支持我工作，佢哋都有嚟睇騷，望住佢哋唱呢隻歌，真係忍唔住啲眼淚！」

柏豪坦言今次EP反應熱烈，將會加推第二版，今年主力音樂發展的他，將於年底再出新碟，問到如何在工作及打籃球取得平衡？他說：「一定係工作第一，我用休息嘅時間打籃球，依家球會都愈來愈多人關注，希望可以正面咁影響更多年輕人，我啲時間分配得好好，盡量唔會畀自己受傷，唔想因為興趣而影響工作。」