李治廷彈結他電暈傅嘉莉

模特兒傅嘉莉與李治廷合作拍攝月餅廣告，她激讚靚仔合作得很開心，雖然在廣告中要「食檸檬」，但現實卻有觸電感覺！

模特兒傅嘉莉（Kelly）與李治廷最近拍攝新一輯月餅廣告，飾演一名貼心女友，問到期間有否親密接觸？她說：「我做個超級好嘅女朋友，會為佢打掃同寫甜蜜字條，就算佢唔理我都默默愛佢。因為講佢係冷待我，所以冇親密動作，反而成日食檸檬！當我想一齊睇電視時佢就起身走，最後我買朱古力月餅令佢回心轉意，嗰幕要我笑中有淚，咁啱Click中情緒就喊到。」

不過，Kelly坦言現實中不會單方面為男友無條件付出：「以前拍拖都會幫男友執屋，但如果佢冷淡對我就唔會默默咁等，會問佢發生乜事。」

讚靚仔又好人

Kelly與李治廷合作前毫不相識，她透過其電影《李小龍》及《歲月神偷》了解對方，更讚他靚仔及好人：「好開心可以同佢過中秋，一直覺得佢好靚仔，喺廣告做佢女朋友好開心。」埋位前，她主動上前傾偈打破隔膜，又讚他得意：「佢好得意，會帶埋結他拍廣告，佢好鍾意音樂，仲即場彈奏畀我聽，覺得佢好有才華，真係好冧！即刻墜入到女友角色！」Kelly指大家均是年輕人，故特別容易溝通，在片場中交流音樂，還打算到對方下月舉行的小型音樂會作支持。