A.Lin醫公主病 北京學戲重新做人

出道近三年的o靚模A.Lin（裴殷）曾出過兩年寫真集，今年暑假卻避戰，轉出手機App之餘，更計劃北上讀書進修演技。

拒絕隨「波」逐流的A.Lin說：「我唔滿足於做o靚模，想挑戰自己！我覺得拍戲有挑戰性，但我覺得自己演技唔夠好，其實舊年已經想去學肢體語言，但因為要配合寫真集宣傳所以押後到今年，去北京讀書學費要兩、三萬人民幣！生活費每個月都要五、六千元，讀年半唔係小數目，我以前又大使慣，次次出街Shopping起碼都使一、兩千蚊，依家真係要學儲錢！」

接Job幫補生活費

A.Lin希望到北京學做戲之餘，亦能學做人：「由細到大我都係屋企嘅『公主』，好少遇挫折，遲啲去北京生活連衫都要自己洗，可能會好唔慣，但我諗可以克服，我捱得起，至驚係冇得捱！希望去到北京可以學識獨立，唔好令身邊嘅人失望。讀書之餘，都會接Job幫補吓，經濟應該唔成問題。我都知今年寫真戰好激烈，我啲師妹出寫真時，我應該已經離開咗香港，希望佢哋到時留番本畀我，我會精神上支持佢哋！」

場地：Sushi Dokoro Hikari