傅穎落妝片段撒網
每次出席公開場合都化妝的傅穎，今年出書竟公開其素顏照。她近期多次將素顏照放上網，但竟被網友攻擊指她假素顏，她即想出絕世好橋伸冤！
戴大眼仔、畫眼線及一頭金髮可謂傅穎（Theresa）的招牌煞食Look，今年再度出書的她，反傳統不拍寫真，反而公開素顏照！她拋個心「赤裸」示人，卻被網友質疑假素顏：「可能我皮膚好白、好透，加上有少少皮膚敏感，所以塊面紅紅哋，所以有人話我造假！」
想秘撈做化妝師
為表清白，Theresa有意拍一段落妝片放上網：「如果我將落妝過程拍成片，啲人冇理由唔信喇啩！」新書更激發起她的化妝癮，周圍為朋友化妝，在電子版中更可一睹其化妝技術：「我會教人化妝同美容，之前我淨係試過幫家姐化，冇幫過外人，到近來有機會為模特兒化妝，先發覺自己手勢幾好，化得幾靚！」她直言有信心秘撈做化妝師搵銀！
傅穎近年發現其化妝天分，有信心秘撈做化妝師搵銀。
早前傅穎公開素顏照，卻被網友質疑造假。（資料圖片）