容祖兒Sell木門自嘲夠平

樂壇天后容祖兒（Joey）獲頒「廣告代言人大獎」，對於有木門廣告找她代言，Joey自嘲夠「平」所以適合。

祖兒昨日獲網站連續第五年頒發「廣告代言人大獎」，成為五連霸，Joey以連身裙出席，她坦言非常開心，當正得到「最佳女主角」一樣興奮：「每次拍廣告要求嘅內容都唔一樣，有時要跳舞、有時要扮女俠，好多唔同嘅挑戰、角色咁，都幾好玩！」

有意代言內衣

Joey坦言代言過護膚品、電器、女性用品等，不過近日有不少五花八門的產品邀約：「呢排收到奶樽、木門囉！好似話七位數字酬勞，我好有興趣o架！（點解木門會搵你？）可能我同道門一樣咁平實，夠晒實淨堅固，咁媽咪通常餵唔掂人奶先用奶樽嘅啫，不過經理人話係因為我皮膚白喎！」問到「升呢」廣告天后的她有否推過廣告？她說：「真係冇乜喎！其實內衣廣告我都可以拍呀！不過外面會着衫，呢個係幾特別嘅一種推銷手法，最緊要係得到大家注意力啫！」

同場的潮人葛民輝及「第四代Canon女」Alice B.一同獲得「廣告代言人大獎」，Alice B.身穿五吋高踭鞋踩場，而杜如風、音樂人陳奐仁、顏福偉及鄧浩光等都有出席活動。