DaDa Sell贏Jeana自封冠軍

書展踏入第2日，一班o靚模為寫真銷量爭崩頭！陳靜（DaDa）昨日在微博自稱寫真銷量第一，何佩瑜（Jeana）得悉後即出言寸爆，更不忘向許穎及趙碩之辣火頭，鬥嘴又鬥銷量！

寫真銷量戰昨日進入第2日，戰況愈演愈烈！DaDa昨日在微博公布喜訊，指收到經理人施念慈消息，其寫真銷量於書展首日榮登首位！她還寸爆指外面說誰勝已不重要，因為她已做到了，更着大家向發行代理查詢：「我唔想日日鬥數字！（Jeana首日賣咗5千幾本？）如果係就恭喜佢！依家只係書展第2日，無論第幾位我都咁開心，今次多咗女粉絲支持。（擔心篤數先公布喜訊？）我係講事實，唔係有事實根據，就唔敢亂認第一，我只知首日肯定係第一！」她更指代言美容院的老闆娘，自掏腰包買下1萬本寫真集以示支持。

寸Phoebe啱拍三級片

至於Jeana與余曉彤（Hidy）昨日坐遊艇出海谷書，出海前更大派紅酒，有口痕友說：「得啲『波皮』有乜好影？」Jeana即說：「我本寫真有王家衛Feel，最啱邊歎紅酒邊睇，酒可以亂性！」其後二人上遊艇玩遊戲，輸家Hidy被罰跳海，幸好她深諳水性，更不用穿救生衣。

對於葛民輝的Icon Girl許穎（Phoebe）胸襲會展，Jeana說：「佢適合去日本發展電影事業，三級、恐怖都得！佢只可以同人逼，我有自己嘅場贏晒！（之前冇提佢？）我唔記得咗佢！（佢將着過嘅泳衣送畀粉絲？）有冇洗乾淨？（效法？）閘住！好肉酸喎！」對於DaDa自稱銷量冠軍，Jeana接受電話訪問時說：「我大姨媽仲見到好多書喺度喎！（比較銷量？）好少蝦啲失敗者！」她更在微博自稱寫真一度斷市要加印。而Phoebe則反擊指Jeana不尊重前輩兼冇禮貌：「我唔會學佢賤賣谷書囉！」

Wylie無意賤賣促銷

至於密實趙碩之（Wylie）昨日到書展時透露，準備4位數字利是慰勞員工，不忘再寸Jeana：「朋友喺網上見Jeana寫真團購價係1蚊本，賤賣就嘥咗工作人員心血！（踩佢場？）費事喇！人哋冇踩自己場已經好畀面！」她透露寫真精裝版附送自設的36D Bra，問到怕不怕惹起宅男幻想？她說：「我唔知乜嘢係其他幻想，應該都用喺身上，可能戴喺頭啩！」而出版社則表示，林青霞新作《窗裏窗外》，短短一個早上已於其攤位售出逾200本。