楊思琦貪新忘舊剪煩惱絲

楊思琦因狠撇李泳豪而成為眾矢之的，煩惱不堪的她把心一橫將留了多年的長髮剪短，準備與新男友吳帥有個好開始，但舊愛泳豪卻不看好：「係愛人嘅就唔應該畀個女人受晒！」

楊思琦昨日以一頭新髮型為無綫節目《寵愛有家》到漁護署拍外景，將留了十年的長髮剪短的思琦予人清新感覺，惟在其心口及下巴依然爆壓力瘡。思琦坦言只想作新嘗試：「髮型師都叫我轉，觀眾都冇咁悶啦！」

而提到李泳豪在內地賽車大受女觀眾歡迎，思琦只是傻笑，未作回應。問到可會恭喜對方？她說：「恭喜佢啦！（泳豪賽車同教車賺到錢？）我都戥佢開心！（報道指吳帥欠債，覺唔覺落錯注？）唔答呢啲問題！（吳帥冇出面為你護航？）唔講喇！（佢喺香港？會帶佢出嚟？）唔知呀！唔答啦！（有冇掛住啲狗仔？）你哋又轉方式問我感情事？都話唔講！（咁身邊人有冇讚你髮型？）你（指記者）又點睇？」

拒評論吳帥

泳豪在惠州賽車酬勞理想，又開班教飄移，收入隨時比演員入息更高，他更視錢嘉樂為目標，正在學泰拳的他，希望在動作方面打好底：「我想同時教車、學拳兼演戲，好似嘉樂咁！（發憤唔衰畀人睇？）一直都有練。（搵思琦？）佢肯出嚟傾我冇問題。（對吳帥感覺？）係愛人嘅就唔應該畀個女人受晒！咁算係男人咩？呢種表現同佢係咪圈外冇關！（會搵佢傾？）冇需要傾！我唔想再評論佢。」