栢芝友情價代言 Rick Chin送車冧Lucas
星級化妝師Rick Chin前晚出席活動時表示，曾與身在寧波的栢芝聯絡，指對方很開心，問到有否探其兩個寶貝仔，他說：「冇日日睇，呢排好忙，有新系列要出。（因為報道少睇咗？）唔關事！有冇呢件事不嬲都有去睇細路仔。」他透露應承Lucas送玩具電單車：「佢講咗要邊樣，依家煩惱去邊度搵。（遲啲去佢生日會？）睇吓有冇時間，人唔到禮一定到。」
Rick Chin指產品將於全國發售，栢芝更已答應代言：「佢好幫手，話收友情價，一出口就叫我唔好搵第二個！之前搞網站佢一毫子都冇收過幫手做代言。（聽過佢帶囝囝返加拿大？）點捨得呀！就算係都等佢哋讀大學先，一路傾都冇呢個打算。」此外，王晶表示已向栢芝度期宣傳新片《無價之寶》，但其經理人指要趕拍《河東獅吼II》，未知能否成行。