霆鋒陷兩難考慮推 Job

彭氏兄弟正籌備開拍有關賽車的新戲，欲找謝霆鋒與郭富城合作，但因知名風水師陳伯生前曾叮囑霆鋒不要揸車，令霆鋒仍未下決心接拍！

彭氏兄弟彭順與彭發正籌備寰宇新戲，題材講述賽車，有意找謝霆鋒與郭富城組成「影帝配」主演，女主角則屬意周迅、桂綸鎂及江若琳擔任。今次角色雖甚具挑戰性，但霆鋒仍在考慮是否接拍，皆因當年英皇御用風水師陳伯曾贈言指他不要揸車，令他陷入兩難！

近日，霆鋒留守家中時靠叫外賣醫肚，幸獲一班朋友如伍允龍及劉浩龍等輪流相陪，睇碟打機減壓！昨午二時許，戴黑超兼頸掛金珠仔金鏈的霆鋒離開栢舍，心情不俗，記者要求停低拍照，他亦有求必應。其後，霆鋒坐車返抵銅鑼灣公司，傳媒即上前影相，霆鋒見狀笑說：「你哋再跟我，會短幾年命！」還指不會早收工，霆鋒助手表哥說：「通宵呀！」霆鋒說話時聲音有點沙啞，但否認身體不適，入𨋢前不忘揮手。

四時許，導演王晶突然現身，逗留約45分鐘後離開，記者問他是否與霆鋒傾新戲？他說：「我哋成日傾啦！未定唔講得住。（幾時開拍？）有期咪拍！（霆鋒心情如何？）幾開心。」

經理人：主要睇檔期

對於寰宇斟拍賽車戲一事，霆鋒經理人霍汶希說：「的確傾緊，要睇有冇檔期。（陳伯係咪叫過霆鋒唔好揸車呀？）傳聞嚟啫！主要睇檔期。」寰宇電影高層林小強則表示仍在計劃中，暫時不方便透露。

堪輿學家陳子才亦認同霆鋒不適合揸車：「霆鋒命格屬木，唔太啱揸車，同埋佢嘅命格會惹上車禍。（點防範？）駕駛黑、藍或者灰色嘅車，或者揸車時着黑、藍或者灰色嘅衫，亦可以戴啲透明同藍色嘅水晶。」