李蘊探軍情傅穎餵飽宅男

書展今日開鑼，o靚模寫真戰「例牌」七國咁亂，要在「亂世」中求存，歌手傅穎（Theresa）選擇買壽司冧歌迷，歌手李蘊及中國小姐趙哲妤則先到場視察「敵情」，實行知己知彼，百戰百勝！

書展常客Theresa每年出書「例牌」吸引歌迷排通宵霸頭位，半百歌迷昨晨5時已在灣仔會展門外排隊，務求第一時間支持偶像今日舉行的簽名會。昨日完成工作後，穿背心及戴黑超的Theresa，帶同兩大袋壽司現身，更無分性別逐一餵歌迷食壽司，令他們既驚且喜！她坦言對歌迷只有無言感激，故現身打氣是最佳辦法：「但天氣又悶又熱，我都好心疼！」本打算親自下廚炮製雞翼的Theresa，因時間緊迫而「冇貨交」，故深感抱歉。問到會否擔心女粉絲安全？她說：「之前都擔心，但依家多咗男歌迷，啲『猛男』仲會留低陪佢哋排隊，所以希望佢哋嘅父母唔好咁擔心！」至於其「宿敵」鄧麗欣年前被指新書錯字多，Theresa是次新書字數「精簡」，只有大量「圖解」講解成長趣事、生活態度及旅遊興趣等，觀感比較雜亂！

驚被Jeana辣埋一份

至於不同公司的趙哲妤（Uny）及李蘊，昨日亦相約到會展「巡視」，順道刺探「敵情」，「寸嘴模」何佩瑜（Jeana）亦有到場視察。對於Jeana的寸爆言論，Uny及李蘊笑說：「好驚辣埋我哋！」並異口同聲讚陳靜（DaDa）的雙封面寫真最吸引，實行當Jeana冇到！談到電台主持查小欣寸o靚模冇內涵，她倆拒對號入座，李蘊澄清自己絕非o靚模，Uny則重申寫真屬藝術路線。此外，李蘊透露前晚曾致電趙碩之互相鼓勵，兩人更在微博表示要交換寫真。