李泳豪聽晒思琦話

李泳豪與父親李家鼎昨日現身泰拳賽，情傷未愈的豪仔頻頻頭耷耷玩電話，對於狗隻「撫養權」問題亦繼續「順得人」：「我一定會順從思琦意願。」而「收晒火」的鼎爺則暗寸思琦媽棒打鴛鴦。

前日到內地表演賽車的李泳豪，昨日偕父親李家鼎到機場博覽館出席《世界泰拳爭霸賽》，席間豪仔頻頻頭耷耷玩電話，心不在焉。

寄語「帶眼識人」

對於舊愛楊思琦及新歡吳帥的種種傳聞，他不欲多談，只說：「我只希望思琦開心同好！（有冇聯絡？）暫時冇。（咁點處理狗仔問題？）我都當啲狗仔係仔女，加上媽咪同阿哥都好錫佢，但萬事有商量，我一定會順從思琦意願。」問到會否開始下一段感情治情傷？他斷言拒絕：「真係未得住！」

至於鼎爺亦指豪仔情傷未愈，並罕有地「零粗口」回應：「佢哋兩小無猜咁多年，依家畀『啲人』棒打鴛鴦！（『啲人』係指邊個？）屋企人囉！唔係點會搞成咁！」雖然「琦豪」拍拖九年，但他表示甚少與思琦媽見面。問到會否接受「琦豪」翻撻？他怒極Say No：「我對佢冇信心囉！只希望佢帶眼識人同要自己思考！」

此外，鄧健泓與緋聞女友龔嘉欣雙雙捧場，惟二人合照時狀甚避忌，強拉同行的胡定欣做「電燈膽」。