趙哲妤Jeana陪客谷寫真

書展後日正式殺到，寫真o靚模為搶「峰」頭連日出招，其中周秀娜師妹何佩瑜（Jeana）昨日擺擂台明挑同行，再邀網友禁室獨處搞噱頭；而中國小姐香港區冠軍趙哲妤亦不甘示弱，使出「陪客」絕地反擊 ！

今年今年寫真戰況激烈，眾o靚模扭盡六壬搶客，其中Jeana憑33C「不倒胸」及寸嘴搶先跑出！為了谷寫真，她不但展開海陸空宣傳攻勢，據知還在網上出招，邀網友後日出席銅鑼灣簽名會，並在現場與「幸運粉絲」禁室獨對兩小時，令人充滿遐想！至於趙哲妤（Uny）亦唔執輸，不惜「陪客」誘粉絲大反擊！

澳門相對10小時

Uny承認寫真集《On The First Take》已決定推出特別版，在書展中以先到先得形式發售，內附Pass可參加由她親自帶團的澳門遊，並於下月出發，與60位粉絲共對10小時任玩任食！Uny笑說：「放心啦！我唔會逼團友買手信，仲準備好私伙靚衫現身。（性感程度？設龍友拍攝環節？）咁就要睇大家嘅反應，賣吓關子先！」

而近日寸嘴寸出癮的Jeana，日前廣發英雄帖，「邀請」同行出席在日本餐廳所設的擂台陣，結果昨日只有同門兼同期出寫真的余曉彤（Hidy）撐場。身穿低胸Tube Top的Jeana大騷「事業線」，而Hidy則騷長腿，二人拗手瓜時，Jeana將咪咪擺上枱借力，可惜出盡茅招仍不敵Hidy，被罰飲加料梳打，Hidy還將忌廉抹在Jeana胸前，場面香艷！

寸對手冇膽應戰

事後，Jeana寸爆其他o靚模冇膽出席：「佢哋講就天下無敵，做就無能為力，唔好再同海龜玩遊戲，真係冇戰鬥心，唔係驚咗我啩？」日前嘲趙碩之墮胸的她，被問最想與誰較量時抵死地說：「墮胸嗰啲！（指趙碩之﹖）唔係得佢一個，大家估吓！（你對墮胸o靚模情有獨鍾？）我唔鍾意墮，我建議佢哋做多啲Treatment同托好啲，我自己好Firm！」對於其「不倒胸」有造假之嫌，她急急解釋：「我唔着衫同瞓覺時都會倒o架！」不過，她說時口窒窒又要助手提水，似乎有軍師教路。