Maggie Q Lyndsy 打女之苦

Maggie Q奠定荷里活打女形象後進軍電視圈擔正美劇《尼基塔》（前名《墮落花》），該劇剛於周一在WarnerTV頻道（now寬頻530台）首播，她早前與拍檔Lyndsy Fonseca在倫敦接受本報記者訪問，大呻做打女之苦。

記：記者

M：Maggie Q

L：Lyndsy Fonseca

記 ：你演嘅《尼基塔》個角色同之前有乜唔同？

M ：我演嘅特務Nikita係觀眾前所未見，劇中講佢逃出政府特務機關後嘅情況，關於佢嘅未來。

L ：我演嘅俄羅斯女子Alex成日惹麻煩，Nikita喺街上遇到佢後導佢返正途。

記 ：拍動作片辛苦嗎？有冇受傷？

L ：以前未拍過動作片，開拍前我同Maggie都接受過動作訓練，確保準備充足。我鍾意呢啲訓練，唔覺得辛苦，但我哋都有啲小傷痕，例如打瘀割傷，我仲因為割傷手有條疤痕。

M ：感謝神，我冇乜受傷，通常長達10個月嘅拍攝過程難免受傷，但好彩冇，我們都好小心同注意安全。

記：有冇用替身？定係全部自己上陣？

L ：Maggie同我都有用替身，但盡量自己上陣。

記 ：你02年套港產片《赤裸特工》打得好悅目，係咪受過武術訓練？

M ：我從來都冇受訓過，武打係好難嘅技術，我好勤力學同下苦功，起初身體唔夠柔軟同彈性，摸唔到腳趾，又唔識踢腿，記得跟成龍學嘢嗰陣佢要我學好伸展動作，真係痛到喊！

Maggie着手寫劇本

記 ：你覺得同Maggie、Shane West合作如何？佢哋係咪好嚴肅？

L ：喺劇中可能係，但Shane人品好好，好易相處，Maggie就好活潑。

記 ：演藝事業方面有冇長遠計劃？有冇諗過返香港發展？

M ：由我喺亞洲加入娛樂事業開始都冇計劃，未入荷里活之前就喺香港展開事業，如果有機會我一定會返香港拍。我依家着手寫緊一個浪漫喜劇，係關於我同朋友嘅真實事迹。

記 ：最近有冇返香港？

M ：我已經有好幾年冇返香港喇，開始拍劇，真係冇乜時間，我全程投入拍劇，都好耐冇去北京。

記 ：回顧香港生活，你有乜感想？

M ：如果冇喺香港發展，我就唔會有今日。我喺香港認識電影呢行，係好重要嘅起步，香港製作成本同資源都有限，但勝在有好劇本，可以拍出極佳嘅作品。