Jeana胸猛口辣 33C娜姐師妹晒料

今年被力捧單飛出擊參加寫真戰的周秀娜師妹何佩瑜（Jeana），為求上位不惜解放「血管胸」，去到邊谷到邊，更揚言「有本錢唔介意畀人睇」，務求以勁爆身材及出位言論，Big走師姐娜姐及一班前輩，搶攻寫真女王之位！

改造

近年不少女星均被指曾經「大改造」，Jeana早前亦被網友翻舊帳，以學生相與目前的她對比，她說︰「我覺得係化妝技巧進步好多，多得化妝師幫忙，呢啲係視覺上嘅嘢，外界搵中一、二嗰陣個樣做對比，當然個樣比之前睇落好唔同啦！其實女大18變，細個係肥妹仔嚟！因為貪靚所以先會打扮，大個咗梗係靚啲o架！」最後，她亦不失寸嘴本色︰「依家做嘢會Keep住個外形同個樣，唔通畀醜嘅一面人睇咩，梗係畀最靚一面大家睇o架！」

率直

寫真女王周秀娜師妹、新八模成員、有「嫩版范冰冰」之稱的何佩瑜（Jeana）。今年被力捧單飛出寫真。雖然未到書展，但她已博到盡，勁騷33C「血管胸」，加上早前「冇大冇細」寸師姐周秀娜要「讓路」而成功上位。對於被指寸嘴，她直言「有嗰句講嗰句」︰「我個人比較直接，唔識得婉轉講嘢，呢個係我性格！」她表示說話「句句有骨」不是為了搶風頭︰「我覺得任何人嘅說話都可以殺死人，是非每日都有o架啦！我都係有嗰句講嗰句，所以難免會畀人誤會，識我嘅人就鍾意我覺得我好搞笑同率直。」

除敢言外，Jeana衣着打扮亦相當大膽，每次出席活動都性感上陣，谷行33C「血管胸」，但她卻不認同自己性感︰「日日沖涼都望住塊鏡，覺得好悶，完全感覺唔到自己有幾性感，自己係鬼妹仔性格，有好多外國朋友都好Open，可能咁樣畀人覺得我好性感啦！但其實我好多朋友都係咁。」她笑言有好身材不怕晒料︰「我出去玩都鍾意性感打扮，反而唔怕畀人望，不過雖然外表Open，但內裏都幾慢熱吓！」問到是否以性感博出位，她從不否認︰「唔介意畀人咁話我，性感博上鏡係事實！因為我真係行性感路線，有本錢唔介意畀人睇，做得呢行就已經豁出去，係為工作而性感。」

全祼

Jeana坦言以前從未計劃踏上性感路，外界受落令她非常開心︰「我行呢條路係因為合作過嘅人都覺得我行性感係掂嘅，出嚟效果係靚，我覺得行性感之後成個人立體咗！而呢個係我人生一個幾好嘅轉捩點，以前冇諗過係咁，但聽番嚟嘅意見係好，自己好開心。」其他人的讚賞令她更有信心︰「行性感係人哋嘅建議，覺得我係呢種人，所以我就會去到盡，唔會覺得後悔，反而多咗人Search我嘅資料係一種榮幸！」

問到會否怕被人抽水？Jeana坦言有辦法應付︰「如果有人想對我摸手摸腳，我會捉住佢隻手反拗佢，唔畀佢亂嚟！」她更自爆曾被人博懵︰「之前去蘭桂坊試過畀人特登撞膊頭，真係好唔開心，可能人哋飲醉啦！但明明佢行緊直線都可以撞咗埋嚟！以後會小心啲！（着得密實啲？）可能啦！但我個人好Casual，睇場合而定，如果需要我性感我可以，不過唔會特登去露。」

Jeana跟師姐周秀娜一樣轉戰大銀幕，在電影《喜愛夜蒲》中的半裸床戰令人印象深刻，她坦言是影壇新丁，希望在影圈不斷摸索，但堅拒全裸演出︰「我好鍾意試唔同嘅嘢，咁先會捉到自己想要啲咩！所以拍戲想試多啲唔同嘅角色，性感尺度要睇番劇本同劇組而定，如果係三級恐怖片都冇問題，不過全裸就未接受到，雖然係性感，但未去到豁出去嘅程度。」

後記

家人100%信任

面對種種負面新聞，Jeana坦言家人的支持相當重要︰「佢哋好支持我，生得我出實明白我，有時啲報道係負面，屋企人冇唔開心，因為我會同佢哋講我工作嘅嘢，佢哋對我百分百信任！」