飯桶樂瞳為食投降

樂瞳正積極減肥，但面對美食卻不能忍口。她又自認易氹，被男友激怒後，對方出動美食攻勢便能將她征服！

文：立 影　攝：謝國華

今年火速「升呢」的無綫女藝人樂瞳最近簽約唱片公司，希望歌視雙線發展，為了迎接新開始，她正努力Keep Fit：「雖然公司冇叫我減，我都想上鏡好睇啲！但我覺得自己身形幾怪，『粗手粗腳』！（點減磅？）夜晚跑多啲步出一身汗，又可以練氣。（唔節食？）唔食嘢好辛苦o架！」

自認是為食貓的她表示前男友甚清楚其脾性，每逢激嬲她後都會出動美食攻勢，她亦樂於被俘虜：「我好易氹o架咋！每次佢買糖水，我就原諒佢，咩唔開心都唔記得晒！」

作狀咀乳豬

雖然正進行減肥，但這日樂瞳到訪九龍城的著名食肆，面對多款美食包括膏蟹蒸糯米飯、招牌即燒乳豬、鍋貼明蝦球及啫啫芥蘭煲，她即大叫口水流，臨開餐時更High爆地與乳豬作狀咀嘴，認真童心未泯！她說：「隻出爐乳豬燒得好香，皮又脆又唔肥膩！至於個糯米飯啲蟹膏嘅香味入晒啲飯入面，好甘香！其實我最鍾意食粉麵飯類，係『飯桶』一個！哈哈！」別看樂瞳身形嬌小，其食量絕對不可睇小：「我同人食自助餐，成日都個個停晒手，得我仲食緊！」

場地：城寨風味　服裝：WHITE CHOCOLATE X Hello Kitty（double 'O'）

髮型：Renton via ILCOLPO　化妝：Vinci Tsang