徐子珊台灣相睇 老外照殺

已多番合作的吳卓羲和徐子珊拍攝劇集《團圓》，但他們齊聲表示高攀不起對方。恨嫁恨到發燒的子珊透露，已漁翁撒網相睇覓佳偶；吳卓羲則暢談揀女友之道，繼續遊戲人間！

文：影視組

徐子珊、吳卓羲及郭晉安在劇集《團圓》中譜三角戀，但「富貴妹」子珊澄清純屬誤會：「我嘅角色只係憐憫安仔，但個心一直喺卓羲度！」讀書時曾情陷三角戀的她，選擇死守在「劈腿男」身邊：「雖然一路都知佢有第三者，但後來仲喺埋一齊一段時間先分手。」但她隨即強調現在絕不容許不忠，自己亦不會做第三者。子珊又自爆歷任男友從不得家人歡心，問到他們是否壞人？她笑說：「男人不壞，女人不愛！哈哈！」

曾與不少小生傳緋聞的子珊透露，入行後曾與一名圈外才俊「有火花」，可惜因Timing不對而放棄，對方亦已結婚，因而啟發她要把握緣分：「我依家會為愛情放棄事業，亦唔介意嫁雞隨雞。家姐早排叫我去台灣相睇，仲Send埋相，原來係個三十幾歲嘅老外，我都唔Mind！」她坦言隨着年紀增長，擇偶條件變得務實：「個樣順眼就得，最重要係有責任感同經濟能力！（吳卓羲啱唔啱？）我高攀唔起佢，佢咁靚仔！哈哈！」

嘆高攀唔起

對於子珊「棄愛」，卓羲笑說：「我都高攀唔起子珊，佢太性感喇！」他自爆讀書時曾遭女友劈腿：「不過死纏爛打冇用，盞嘥時間！（讓愛？）咁又唔會，等佢自己揀囉！」緋聞多多的卓羲，隨即暢談「揀女」之道：「女仔太主動會嚇親男仔，太含蓄又會追得好辛苦！」對於與「內地乳牛」張馨予的「接送情」，他說：「接人冇咩大不了啫！而媽咪都冇催婚，亦從來唔會干涉我揀女朋友。」