松岡李那玩狗自娛

日模松岡李那抗拒與其他模鬥性感，反而希望與粉絲分享生活點滴，早前更帶同寶貝狗出外拍攝，寓工作於娛樂與寶貝狗玩樂一番。

今年不少模加入寫真戰，不過日模松岡李那（Linah）沒有計劃推出寫真集，反而與同門的「邦民女」陳嘉寶（Anjaylia）及蔡穎恩（Evelyn）等推出DVD分享日常生活，早前她就帶同寶貝狗到戶外拍攝首個DVD雜誌《Summer romance》，分享與寵物的生活點滴，她透露平時不用工作會跟寶貝狗玩樂：「佢冇時停，成日跑嚟跑去，我會用日文同佢溝通。」

為滿足宅男粉絲，她表示DVD內會有性感沙灘泳衣照，騷Fit爆身材︰「DVD都會記錄我嘅工作，嗰陣係為一首歌喺沙灘拍MV，我唔抗拒性感，如果有客戶搵我影泳衣或者內衣工作，影得靚就冇問題。」

學普通話辛苦

此外，Linah在DVD中處女下海首次唱普通話歌，她坦言最初找老師學普通話相當辛苦︰「因為自己未學過普通話，要發音準確先可以錄歌，如果唔係人哋唔知我唱緊乜，所以首歌錄咗個禮拜。」問到會否進軍樂壇做歌手？她說︰「其實都有諗過，但會學好普通話先，搵老師上堂，如果唱歌都會揀普通話同英文歌唱，因為想進軍內地市場。」