Edison黑面避走 霆鋒冷笑

謝霆鋒昨日心情大靚往中環Salon整頭，竟撞正有傳導致鋒芝婚變的「程咬金」陳冠希（Edison）路過！Edison聞「鋒」色變，即時避開記者兼黑面快閃，相反霆鋒全程保持微笑！

哄動全城的「鋒芝婚變」擾攘多時，曾有傳夫婦決裂的「導火線」正是栢芝與Edison於機艙合照一事。Edison的床照風波曾經令栢芝傷害甚大，身為老公的霆鋒當然跟他勢成水火，豈料昨日陰差陽錯下險撞到正，認真冤家路窄！

昨午三時許，霆鋒乘坐保母車到天后睇中醫，直至下午四時四十分，再跟助手轉到中環皇后大道中的陸佑行一間Salon整頭。豈料相隔不足三十分鐘，戴Cap帽的Edison與男友人路過該地，心情輕鬆兼笑容燦爛，更主動八卦記者採訪何人，有記者笑說：「你『老友』整頭呀！哈哈！」他聞言即牽強地笑一笑，當記者再提到「謝霆鋒」或「張栢芝」時，Edison即聞「鋒」色變，加快腳步衝入旁邊的振邦大廈避記者，跟霆鋒的所在位置僅僅相差兩幢大廈，夠晒「有緣」！

陳奕迅：最多咪互睥

約二十分鐘後，Edison以九秒九跑離現場，當記者上前追訪時，他全程黑面不加理會，態度180度轉變！相反，霆鋒於六時許離開，提到Edison剛剛出現，他表現愕然後冷笑說：「係咩？（Edison啱啱經過？）呢度好多人都經過啦！」當追問有否嬲對方及心情如何等，霆鋒全程保持微笑，臨上車更揮手道別。

身為霆鋒好友的陳奕迅昨晚出席活動，被問到霆鋒差點與Edison碰面一事，他說：「我點知啫？謝霆鋒啲嘢答到好煩，好彩我唔識楊思琦，如果唔係又關我事！（你認識嘅霆鋒會點處理？）理得佢啫！佢唔會理其他人，淨係識玩黐手、武術同埋電影，其他乜都唔理。佢成熟呀喇！成年人點會郁手？最多咪互睥一下！」