Jeana三招 Big走Hidy

寸嘴33C何佩瑜（Jeana）辣慶師姐周秀娜，娜姐擺明只撐另一師妹「濕身徐子淇」余曉彤（Hidy）的寫真，Jeana遂以不倒血管胸、頭髮遮點及珍寶寫真Big走Hidy，惹來Hidy反寸：「大唔係一切！」

有「嫩版范冰冰」之稱的Jeana憑33C自封「性感宗師」，由組合變成單飛出寫真的她寸嘴辣火頭，雖然師姐周秀娜明言只買同門「濕身徐子淇」Hidy的寫真，但Jeana未有收口，設下寫真擂台向o靚模挑戰。

Jeana與Hidy的寫真昨日同步面世，Jeana以三招Big走Hidy，推出比對方大一倍的寫真尺寸贏牌面，尺度亦比對方去得更盡，Jeana瞓地時「血管胸」變成神乎其技的「不倒胸」，還使出僅以頭髮遮點的絕招力撼。她的寫真不乏胸部大特寫，問到會否怕被批評意淫？她表示寫真充滿電影感，自覺好靚：「控制唔到人哋點諗，歡迎發表意見，自己唔會戴有色眼鏡。」她早已預備被「踢館」：「我有偉大『胸』襟，冇人嚟仲好，原本想請大家食嘢，冇人嚟就自己食晒囉！」

「大唔係一切」

Hidy不覺寫真尺寸大小不同是公司大細超，認為賣$1,600兼送平板電腦是受重視，談到Jeana的寫真，她即暗寸：「有睇過，望過兩眼，但大唔係一切！（佢打假波？）佢假唔假我就唔知，但我喺書度分享嘅感受就係真。」她自信十足，打算舞獅到o靚模簽書會踩場：「我玩開運動，着重力量，唔怕唔夠撼，仲會揮低佢哋！」