陳奕迅「三寶」合體 20蚊都制

陳奕迅前晚在廣州出席頒獎禮，以4獎成為大贏家。談及再與梁漢文及楊千嬅舉行「華星三寶」音樂會，他坦言不計較平分歌酬：「都係廿蚊雞，意義大過錢！」

在廣州舉行的《第11屆華語音樂傳媒大獎頒獎禮》前晚揭曉，陳奕迅（Eason）以4獎成為大贏家，捧走「最佳粵語男歌手」及「百家傳媒年度最受矚目專輯」等大獎，當他演唱時，觀眾紛紛擁上前！返回後台後，Eason雙手各執兩獎拍照，但由於獎座頗重，他十足「大隻佬」般將獎座當啞鈴！

冇聽霆鋒談心

Eason日前與梁漢文及楊千嬅舉行音樂會，三人玩得勁開心，並希望再度合作開騷，問到歌酬是否最多，Eason笑說：「吓！我咁多咩？唔知喎！（歌酬平分？）冇所謂，都係廿蚊雞，意義大過錢！」三人由98年開始被稱為「華星三寶」，Eason坦言感覺得意，問到會否於「三寶」15周年時開騷，他說：「咁都好呀！到時可能大家都有仔女，可以帶上台一齊玩！」問到返港搞離婚的好友謝霆鋒有否找他傾心事，Eason說：「佢唔會搵我講，因為佢講唔夠幾句就畀我講晒，圈中唯一對手係何超儀，佢係『吹后』！」

至於Twins則當選「年度最矚目組合」，但因蔡卓妍（阿Sa）忙於拍戲而缺席，由鍾欣桐（阿嬌）代表領獎。身穿7吋高踭鞋的她說：「好似紮腳咁，企定都有啲搖！」早前她捲入鋒芝婚變，問到有否聯絡霆鋒，她說：「冇，平時都冇搵！（為佢哋可惜？）算啦！係佢哋嘅選擇！」得獎的還有何韻詩及農夫等，而擔任表演嘉賓的劉美君則獲男友充當「柴可夫」。