專家：切忌問想跟邊個

鋒芝一對寶貝仔Lucas及Quintus分別近四歲及一歲多，假如鋒芝決定離婚，應如何妥善向他們交代？藍天心理諮詢中心臨床心理學家鄒凱詩建議，家長不要因子女年幼而選擇不解釋：「四歲嘅認知能力有番咁上下，但未必明離婚嘅意思，要具體化解釋，例如話：『爸爸媽媽會去唔同地方住，但都會見面。』亦要佢知道父母唔會因為咁唔愛佢，由好處着手接受性會高啲，例如話：『以後聖誕節會收到兩份禮物或會有兩個生日會。』如果只得一歲幾，就要畀佢有安全感，最初可以分開安排親人多啲陪伴，令過渡期分別唔大，父母一定要定期同佢見面，等佢有番父愛同母愛。」

鄒凱詩指若處理不當，可能影響子女長大後對成人、伴侶或婚姻睇法：「切忌問子女想跟邊個！咁會令佢哋學識睇眉頭眼額做人，冇咗童真。」問到經常忙於工作的父親應如何保持親子關係，鄒凱詩指除了身體接觸建立依附關係（Attachment）外，有心更重要：「做藝人嘅時間未必夾到小朋友節奏，但依家科技咁發達，有好多方法聯繫同接觸，係真錫嘅話小朋友會感覺到。如果真係冇辦法，就要安排個穩定嘅依附對象，好似嫲嫲或婆婆，轉得太多會令佢哋冇安全感。」