曹敏莉誕8.7磅「多多女」

冠軍港姐曹敏莉昨日剖腹誕8.7磅囡囡，並改乳名為「多多」，夫婿Jacky初為人父更開心得眼濕濕。

昨晨曹敏莉（Mandy）在老公Jacky陪同下入產房開刀，順利誕下8.7磅女兒，二人已為囡囡改英文名為Dora，乳名「多多」。餵哺母乳的Mandy昨日接受電話訪問時，聲線尚算精神，但表示有點累，她直言生BB比她預期中辛苦，但當親吻囡囡後，囡囡向她單眼，即令她窩心得無限滿足，她說：「幾辛苦都抵！（擇日開刀？）參考過啫！」

肥嘟嘟似爸爸

剛為人父的Jacky亦十分緊張，更發生不少瘀事，Mandy笑說：「我叫老公做Jacky爸爸，佢即刻眼濕濕，跟住佢陪我入產房幫BB影相拍片，但全程掛住拖我隻手，要醫生提佢先識得拍。（囡囡似邊個？）我覺得眼長長似我，但個嘴就似老公，整體都似老公嘅，因為囡囡圓碌碌，肥嘟嘟！（BB中文名？）唔會搵師傅改，因為老公都唔係迷信嘅人，其實中文名我都有兩個心水，最緊要係有意思同好聽！（再追？）暫時唔會！」