睇港男寫大字 高海寧楊秀惠「峰狂」

高海寧及楊秀惠前晚以性感裝扮出席香港先生活動，Big爆的高海寧「峰」殺全場，最近跌Cup的秀惠亦不禁向她請教護胸秘笈！

應屆11位候選港男前晚出席荷里活廣場活動爭做文狀元，以毛筆寫書法一展才華，但可惜字體均麻麻，程度更如小學生，慘被同場三位性感女嘉賓高海寧、楊秀惠及朱慧敏搶盡風頭！

身材豐滿的高海寧以谷胸裝跌盪出場，「Big」爆效果吸引大批龍友及市民狂影，她解釋因港男需要靚女配襯，並表示已準備戰衣出席決賽：「都係以靚為主，再突破就要比堅尼啦！」至於楊秀惠以Deep V上陣，清減不少的她表示上圍跌Cup：「掉咗好多Bra！驚胸細咗會下垂，要做多啲護理！（請教高海寧？）有呀！佢好挺！都係教我按摩、適當運動同搽Cream！其實今日個Bra都有特別效果，可以將胸形集中喺前面o架！」

朱慧敏游說男友參選遭拒

首次與港男見面的朱慧敏，原來不喜歡男士太大隻，還順勢狂讚男友Fit兼識多國語言：「我游說過佢參選，但佢拒絕我！（結婚對象？）係呀！但要過多幾年先。（驚筍盤畀人搶走？）佢都驚我畀人搶，總之依家好好！」大熱之一的(1)號蕭家浩最近因壓力大而消瘦，問到會否驚輸蝕？他說：「都唔驚，希望唔好再瘦就OK，依家Keep住要放鬆啲。」