Kylie抵港開騷不忘Shopping
澳洲天后Kylie Minogue事隔三年再來港開騷，將於今晚在灣仔會展舉行Aphrodite巡迴演唱會。Kylie昨晚六時許抵港，身穿吊帶低胸裙、戴黑超的她，全程由一名外籍猛男貼身保護，雖然零粉絲接機，但她笑面迎人，甫見在場約二十名記者即揮手打招呼，親民到極！
Kylie透露剛完成新加坡站巡唱，對於香港記者的熱情非常驚喜，略現疲態的她說：「我好耐冇嚟過香港嘞！見到大家有啲受寵若驚，好興奮！」由於面前咪牌太多，未知是否擋住其視線，她一度用手撳低咪牌。
卸貨區入酒店
問到其巡迴演出時，Kylie興奮地說：「真係非常之好，我同香港好有淵源，好開心再嚟開騷！（會去Shopping？）雖然冇咩時間，但我都係女人，點都會抽啲時間出嚟行街。」
Kylie受訪後登上專車直駛灣仔君悅酒店，在職員安排下從卸貨區進入酒店，她完成香港站後將飛台灣、馬尼拉及南非繼續開騷。
戴上黑超的Kylie由一名外籍猛男貼身保護，對於再來港開騷，感到非常興奮！
澳洲天后Kylie Minogue友善親民，全程笑容滿面。
Kylie早前在新加坡開騷，在台上勁歌熱舞。