李彩華甜蜜相思

事業愛情皆得意的李彩華，最近經常返內地拍劇，與金融才俊男友潘啟翀分隔兩地，她坦言與男友互相掛念，而信奉基督教的她，還感激上天對她的眷顧。

戀愛

感情路上幾經波折的李彩華（Rain），早前被本報踢爆與金融才俊男友潘啟翀（Derek）拍拖夜蒲，還愛到難捨難離。她為保護戀情，甚少提及男友，而小情人仍要各自為事業奮鬥，有時要分隔兩地，飽受相思之苦。

事業順風順水，感情生活亦穩定，其實Rain入行至今戀情及緋聞多姿多采，她曾與林峯、方力申、丁子高及蕭定一傳緋聞，08年底Rain與東華仁愛堂總理王傲山拍拖，不時被拍到飯敍及出席活動，但戀情無疾而終。早前她被本報拍得與金融才俊Derek拖手夜蒲，打得火熱，雖然她因經常往返內地拍劇工作，要與男友兩地相思，但無礙戀情發展，問到是否無時無刻惦掛男友？她甜絲絲地說：「大家都有工作，互相掛念。（穩定？）OK嘅！上天眷顧我的一切。（結婚？）咁又未諗，大家努力工作先。」話口未完記者日前發現她的Facebook竟寫上「Married（已婚）」，旋即惹起結婚疑雲，她立即澄清自己仍是單身一族，只是年底有很多好朋友結婚而已。

情傷

Rain暢談愛情觀，她說：「拍拖當然要一對一，但以前試過唔係一對一，曾經有第三者出現過，好迷惘同對感情失去信心，而且每次重新一段關係，需要好多時間了解，有時都幾攰。」入行初期Rain曾與林峯傳緋聞，現時兩人感情生活各自發展。談到林峯與潘霜霜的戀情，她不欲多言：「我好少八卦佢（林峯）啲新聞，都冇時間睇。（會唔會覺得林峯好慘？）咁大家係朋友，我都想朋友生活開心嘅，（聯絡？）好耐都冇聯絡。」

事業

龐大的內地市場，無疑是一個「吸金」好地方，近年Rain轉攻內地巿場，拍劇登台吸金，豬籠入水之餘，知名度亦日漸提高，一切全拜參演內地劇《回家的誘惑》所賜，她說：「套劇喺內地有幾億人睇過，真係好開心，工作量多咗！」據悉Rain拍完《回》劇後，身價急升，現時拍劇每集片酬為6位數字人民幣。

問到未來日子會否長駐內地？她說：「冇刻意咁諗，人哋誠邀你拍劇，加上又有好劇本，當然唔會放過機會。（放棄香港市場？）又唔係嘅！但做人要不斷進步，要努力搵機會，內地市場真係好大，又有唔同嘅製作公司，6年前我返內地拍劇，得到好多機會，闖出一片天。」

迷失

Rain坦言曾迷失了一段時間，她說：「曾經有一瞬間諗過放棄，但突然又有轉機，可以返內地拍劇。（吐氣揚眉？）都有少少呢種感覺，我依家接Job都係靠自己，係前所未有嘅大個女。（升呢？）唔好咁講，總之一路學習中。（變成女強人？）啲朋友都覺得我好堅，有時大家食飯或唱K時，我會無啦啦喺電話度傾工作，感覺幾得意。（有冇機會爭內地視后？）獎項冇所謂，錦上添花，有人喜歡角色已經好開心。」問到是否已是小富婆一族？她謙稱：「繼續努力，要畀心機儲錢先得。」

後記：信主得救﹗

近年信奉基督教的Rain，閒時愛閱聖經及返教會，她坦言信仰令她重生。自從信了基督教後，人也變得釋懷，她說：「以前好多嘢諗唔通，成日埋怨，但依家祈禱求主幫忙後，好似得到指引，行條光明嘅路。」果然信主得救！