王淑玲 李善恒互食檸檬

味之天使「香蕉」王淑玲（Vanko）與無綫型男李善恒（Jacky），因合作飲食節目而成為歡喜冤家，Jacky向Vanko大派檸檬，Vanko則反擊若然節目添食，第一時間要「叮」走Jacky﹗

早前因拍攝飲食節目《街坊廚神》而為人認識的王淑玲和李善恒，私下老友鬼鬼。雖然《街》已經播完，但這對歡喜冤家渴望節目能夠「添食」，並衝出香港，到台灣、澳門或廣州取景。Vanko搞笑地說：「如果節目真係添食，首先要換走Jacky，等其他男仔有機會拍！」Jacky即反駁：「佢怕對住我太耐，會日久生情呀！（咁有冇生情？）生咗友情囉，冇愛情！佢唔係唔好，但唔係我杯茶，我鍾意藍莓（劉俐）嗰類型多啲。」

甜品男最吸引

Vanko在《街》亦與另一名前港男溫家偉（Alan）合作，她直言Jacky適合做老公，而Alan就適合做男友：「Jacky畀人感覺穩重成熟，Alan就好識氹女仔，而且份人幾浪漫！（同Jacky由冤家變情人？）咁冤多陣先啦！（揀男友要識下廚？）識整甜品嘅男仔更加吸引，因為自己本身都鍾意食。」問到本身是否懂烹飪？她說：「唔識o架！最叻煮公仔麵。」另外，Jacky和Vanko均大讚金剛和阮小儀是好主持，Vanko說：「小儀識好多嘢，係良師益友；金剛就講嘢好好笑，佢呢種性格好啱做好朋友！」