樂瞳出錢出力孝順老竇
最近「宅男女神」樂瞳忙於拍劇，日前抽空陪爸爸飲茶兼行街市做孝順女。當日下午一時許，樂瞳與爸爸和細佬在東涌一間酒樓飲茶，樂瞳不停夾點心給爸爸，埋單時更爭住畀錢。其後三人在商場內行逛，樂瞳被不少學生認出搭訕及拍照，他們行勻男裝店及電器店都沒有收穫，最後轉戰街市買餸，全程由樂瞳付錢，認真乖女！
樂瞳接受電話訪問時表示父女關係如朋友，平日會一齊唱K及打保齡：「開心嘅日日都係父親節！平時得閒都會同阿爸飲茶，佢好鍾意唱陳奕迅啲歌，好Ino架！（細佬攞住大結他，係咪想入娛樂圈？）唔係！佢初學結他，希望我將來有機會開Mini Concert，叫埋佢嚟Jam歌！」她直言仍會盡量畀錢家人：「今個月會囉！收入唔多，要慳住嚟使，希望工作愈嚟愈多啦！」
樂瞳（左）與父親和細佬一個餅印，齊齊行街享天倫樂。
樂瞳陪爸爸飲茶爭住埋單，認真乖女！