林欣彤踩行油搶攻新人獎

「超級巨聲」冠軍林欣彤昨日舉行新歌發布會，獲無綫及英皇的高層到賀。身為「親生女」的她可謂頒獎禮新人獎的不二之選，她坦言不擔心被指內定，會盡力贏得認同。

林欣彤（Mag）加盟英皇後，昨日正式推出首隻主打歌《洗澡》，英皇豪擲六位數字為她舉行新歌發布會，筵開11席招呼傳媒。英皇高層吳雨、霍汶希、無綫高層樂易玲和陳家揚等撐場，而英皇師兄師姐錄短片祝賀，好友陳奐仁、趙增熹及「巨聲幫」到場祝賀。當「巨聲幫」上台獻花時，Mag感動到眼濕濕！大合照時，緋聞男友羅孝勇刻意企開避免尷尬，她說：「我都係今朝先知『巨聲』會嚟，真係好感動，今日係個好大嘅祝福！」

唔怕觀眾睇厭

Mag坦言有感萬千寵愛在一身，問到會否有壓力？她說：「有時會，每次上台或者錄音都好大壓力，好多人對我有期望，自己亦好大期望，希望將呢啲轉化為力量！」她透露新碟已錄好一半，預計八月推出。身為TVB「親生女」，問到會否擔心TVB狂播MV而令觀眾生厭？Mag說：「希望佢哋唔會驚啦！呢首歌我好鍾意。（攞硬年底新人獎？）唔知呀！盡力啦！（驚畀人話內定？）如果係新人獎，我盡咗力，大家睇到我嘅努力的話，我唔怕！」