栢芝好友微博全文

一路以來，栢芝對於各大報章的報道均不作出任何回應，一直避開所有記者，為嘅都係為頭家，栢芝真係唔想頭家就咁就散。其實栢芝真係好難受，每日每份不同嘅報章雜誌都對佢作出不同嘅攻擊，對於失實及無理嘅指控，佢只可以啞忍，因為唔想影響到兩個仔，諗住忍一時風平浪靜，點知退一步就畀人傷害得更深。其實一直都有勸佢企出嚟講個事實畀大家知，但係佢點都唔肯，佢話唔想頭家散，而且始終係一家人，唔想傷害到任何人，尤其係兩個仔。我見到栢芝不停畀人講而自己又唔出聲，身為佢嘅好朋友，真係好心痛同埋好嬲，所以我決定將事實真相說出來，等觀眾唔係淨係聽一方面嘅故事。

「喺屋企亦都做戲」

謝霆鋒得到最佳男主角呢個獎真係實至名歸，我話畀你哋知，因為佢唔單止對住觀眾做戲叻，喺屋企亦都做戲，你哋覺得謝霆鋒一定係一個好爸爸好老公啦，實情係佢除咗喺產房出現過之外，喺屋企完全冇理過兩個仔，佢係可以個仔行過佢身邊都可以當見唔到，淨係掛住打機，可以自己一個對住部電腦成日都唔同個老婆兩個仔講半句說話。講真，佢哋結咗咁多年婚，我眼見佢哋一年都係同枱食飯幾次，其餘時間就係對住部電腦，喺間房度不見天日，個老婆喺邊，唔知，個仔病，唔知又唔理，咪又係栢芝自己一個搞掂，基本上係栢芝自己一個湊住兩個仔，咁你話好爸爸好老公係咁做？

你地話栢芝貪錢？你知唔知謝霆鋒依家坐緊部保母車都係栢芝送畀佢，佢手上戴嘅錶幾十萬，又係栢芝送畀佢，如果佢真係咁貪錢，有冇需要使咁多錢喺個老公身上？

「逼栢芝提出離婚」

依家報紙雜誌日日報道唔同新聞，查小欣爆料，又話係狄波拉講，實情就係謝霆鋒借個阿媽把口講晒啲嘢出嚟，目的就係逼栢芝開口同佢提出離婚，咁佢咪可以繼續扮演一個好爸爸、好老公囉，佢仲可以同人講係栢芝要同佢離婚，唔關佢事添，將所有罪名推晒畀栢芝，如果佢真係一個好爸爸、好老公，點解放假嗰幾日都唔見吓對仔同個老婆？唔好話見，電話都冇個，乜好爸爸好老公係咁做嘅咩？

有件事仲離譜，點解要出律師信要求見兩個仔？法律上謝霆鋒同張栢芝依然係兩公婆，從來冇簽過任何離婚甚至分居紙，見兩個仔寧願出律師信都唔打個電話畀老婆，究竟目的何在？咪又係逼栢芝開口同佢離婚囉。

仲有啊，狄波拉同人講話栢芝冇權要兩個仔o架，佢話兩個仔係姓謝，係屬於謝家，栢芝只係負責生，我真係唔明，點解作為一個媽媽、嫲嫲、奶奶嘅佢會講出咁樣嘅說話，栢芝選擇唔開口係希望所有事情有彎轉，做所有事都係為咗兩個仔，保護兩個仔，甚至盲目維護佢老公個形象，而有人就惟恐天下不亂，不停將屋企嘅嘢周圍同人講。

其實謝霆鋒最叻就係利用身邊人為佢做事，好似2002佢頂包事件，開審期間不停叫栢芝為佢做呢樣做嗰樣，一知道唔使坐監，咪即刻一腳伸開栢芝，講真，如果唔係因為栢芝咁愛謝霆鋒，點會一次又一次畀佢傷害到？仲要為佢生兩個仔。

我今次將件事講出嚟，係希望畀所有人知道真相係點，睇清楚究竟係邊個努力去維繫一段婚姻，邊個處心積慮唔理傷害人都要達到自己自私嘅目的。