吳天瑜身價暴升揀百萬辣跑

99年代表馬來西亞來港參加「國際中華小姐競選」的吳天瑜，早年返馬來西亞投資餐廳賺個滿堂紅，身價暴升，日前來港即睇百多萬新款開篷跑車，又跟著名餐廳太子撐枱腳，舉止煙韌儼如情侶！

吳天瑜（Debbie）09年返馬來西亞發展演藝事業，亦投資飲食生意，在吉隆坡雙子塔附近開設一幢兩層高的獨立別墅式印尼餐廳，生意漸上軌道的她回流返港再闖影壇。日前Debbie穿斜膊衫及短裙到灣仔名車陳列室，打扮貴氣逼人，由經理人及助手陪同的她明顯是熟客，甫到場即獲「星級款待」，由車行經理全程貼身護駕，在車行兜了幾個圈的她，對一架價值170萬元的新款開篷跑車情有獨鍾。試坐後的Debbie狀甚滿意，又不停詢問詳情，笑笑口的她似已決定扑錘！

港版聰仔幫抹嘴

其後，Debbie轉戰銅鑼灣名店逛了個多小時仍未有斬獲，撇甩經理人及助手後，獨自往香港老字號印尼餐廳，甫入店即在靠窗位置坐下。一名貌似妻夫木聰的型男坐在她對面，該型男正是餐廳太子爺蔣翹帆（Hudson）。兩人邊食邊研究餐牌似為餐廳試菜，態度親暱，一杯飲品兩份飲，見Debbie嘴角沾有餘羹，Hudson細心拿紙巾為她拭擦，親密關係不言而喻。據悉，Debbie在吉隆坡開設的印尼餐廳，合夥人正是Hudson！試菜一小時後，Hudson先行離開，再駕駛平治接載Debbie。事後Debbie在電話中坦承Hudson是她生意上的夥伴：「我負責Marketing，佢負責食物質素。（拍拖？）我哋識咗好多年，係好好嘅朋友。（有冇發展可能？）冇話冇可能！」她透露今年回港發展，主力演藝事業，餐廳生意放心交給Hudson打理。

Profile：

姓　　名：吳天瑜（Debbie）

年　　齡：32歲

三　　圍：34D、25、35

入行經過：99年代表馬來西亞來港參加「國際中華小姐競選」後入行

電影作品：《犀照》、《奪標》、《瓦煲人肉咖喱》（暫名）、《戀愛吧》

曾獲獎項：馬來西亞華裔小姐冠軍、第一屆《金視獎》「最受歡迎女主角」