周柏豪緋升 楊梓瑤脫o靚

在娛樂圈上位除靠個人實力，還可靠身材、是非或緋聞，周柏豪與何家淑女超蓮及超雲的緋聞傳得熱烘烘，楊梓瑤與o靚模互寸掀罵戰，均成為當時熱話，如今兩人成功上位，成名後的路應怎樣走，選擇默默耕耘行拚搏之路，還是言行大膽製造話題？兩人均希望靠努力去力爭上游！

模特兒出身的周柏豪是近年上位最快的男歌手，無論外形、歌唱事業及緋聞也「大躍進」，其中與賭王何鴻燊兩位千金何超雲和何超蓮爆出緋聞，被封「賭王女婿」令人氣急升，問到是否覺得緋聞令其知名度大增？他認為緋聞令更多人認識，但不覺得靠此上位：「焦點唔係放喺我工作上，之後我唔回應，因為我把口快過個腦，有啲報道嚴重誇張，寧願將件事溝淡，費事愈變愈複雜，唔回應就會少咗人寫，甚至到最後冇人寫，呢招確係幾奏效！」

未需要拍拖

柏豪表明現階段未有拍拖需要：「總會有時間拍拖，但暫時未有需要拍拖，但身邊人好緊張我幾時拍拖同結婚。（同超雲碰面會尷尬？）開頭冇咁尷尬，之後傳得好勁，又真係尷尬！私底下我哋冇見面，唔算多聯絡。」他更自爆擇偶條件：「要錫屋企人、小朋友同小動物，一定要係好人。（外貌、身材？）合眼緣已經OK。」入行近四年，現年27歲的柏豪回想10年前的模特兒歲月，與現時確有天壤之別：「嗰陣鍾意打機，我同Boy'z算係『模』鼻祖，以前純做Model工作，依家Model仲要出寫真同拍戲。」對於被睇好成為上位男歌手，柏豪謙稱：「我唔係『嘭』一聲彈上去，反而逐級逐級上，要不斷增值，無論音樂上或其他方面，仲係吸收同學習。（剛入樂壇與現時嘅分別？）處事方面大膽同成熟咗。（成為樂壇接班人？）咁又未，仍有段距離。」柏豪既非新人，但未去到神枱級歌手，問他處於哪個位置？他說：「一艘駕駛得好慢嘅船，但會駛到要去嘅地方。」

人性陰暗面

愛尋求突破的柏豪在即將推出的EP《本体分裂》中，展示分裂一面：「無論對父母、自己、朋友或者情人，每個人內裏都藏有好多分裂細胞。（你最分裂係幾時？）肚餓嗰陣，個人易失控，情緒好差，飽肚後識得控制自己。」他又用「小丑」代表專輯概念：「小丑被標籤為負面、陰暗一面，其實小丑帶畀人歡樂，正如藝人都係娛樂大眾。」柏豪坦言也有陰暗面：「我嘅陰暗面唔係做壞事，只係一個人時會變得悲情啲、匿埋寫歌；變番『光明』嗰陣，會講好多嘢，會去滑水同打波。」近年不少藝人歌手中了「微博毒」，柏豪平日愛在微博抒發情感，不平則鳴，故引起不少是非及緋聞。寇鴻萍女兒唐貝詩曾因「盆景貓」事件遭全城圍插，愛動物的柏豪亦曾在微博發聲：「由細到大，見到唔公平同唔正義嘅嘢就會出聲，應該要尊重小動物生命，我唔會無端撩是鬥非。（怕畀人話惹是非？）唔怕。」

年僅22歲的「浸大E神」楊梓瑤（Carol）去年憑E Cup上圍彈出，推出噴血寫真大賣，其逼爆身材冧掂宅男，出道短短一年已成當紅模，她說︰「我會挑戰自己，喺呢行冇諗過要去到咩位，凡事由低做起，人哋覺得我掂咪有機會囉！（上位之路？）我曾經Sell性感，一出道要人留意就要搵一樣嘢去突出自己，以前用性感令人對我印象深刻，依家唔係話要收起性感，但想着重演戲，因為我鍾意做戲！但背住o靚模呢個名，會畀人覺得只係賣身材，唔想人咁諗，覺得拍戲除咗性感，仲有演技！」

Carol今年升呢踏入影壇，接拍4部電影，在新片《戀夏戀夏戀戀下》中穿比堅尼，但她指這些濕濕碎︰「嗰套係青春陽光同着比堅尼嘅笑片，唔會Sexy得去邊啦！」提到Jeana（何佩瑜）在新片半裸上陣只以手遮胸？Carol笑說：「我冇咁大勇氣，《婚前試愛》露背係最盡，露吓背脊冇所謂。」問到上位後會否「封胸」？她指一切順其自然︰「身材係媽咪畀我嘅，唔會刻意去改變自己本身有嘅嘢，依家夏天，自己青春又有本錢梗係要發揮吓！（全面轉型？）我仲諗緊，依家係摸索期，當然有戲拍我會接啦！最緊要有得發揮，做咩角色都冇所謂，遲啲仲會提升自己嘅演技同談吐，要努力證明畀人睇我係演得戲嘅！」

敖犬唔啱Feel

正所謂樹大招風，圍繞Carol的新聞多的是，早前她與十多位o靚模赴海南島拍攝《戀》片，難免爭風呷醋，但Carol澄清︰「人在異地互相照顧，個個都好Friend，有交換電話！」問到有否與男演員過電？她坦言跟台星敖犬最多接觸︰「好似失散多年嘅兄妹，佢幾搞笑，大家幾Friend o架！但佢唔係我鍾意嘅類型。」她不願多談感情生活︰「想專心啲做嘢，感情放埋一邊先！」Carol今年拒玩寫真戰︰「今個月23號23歲生日，我會開始寫日記，記錄自己嘅諗法，講吓自己嘅內心世界，希望成為下一本寫真嘅一部分啦！我冇否認過唔出寫真，只係想再出寫真要有更好嘅橋，諗唔到就真係唔出住！」

與樂仔從模到友

誰說圈中沒有知心友？周柏豪與余文樂確實有點相似，兩人無論在出身、喜好及外形都好像倒模一樣，就連生日都只是相差兩天，儼如親兄弟，難怪柏豪說：「我同阿樂屬同一間模特兒公司，大家又鍾意打籃球同滑水，加上我哋背景、樣貌同身形都有啲似。（有冇衝突？）咁又冇喎！玩得好開心，佢仲幫我好多，係一個好兄弟。」

摸視后胸超尷尬

影壇新貴Carol影齡雖淺，但已與視后佘詩曼合作新片《人約離婚後》，訪問當日她還自爆跟阿佘有親密接觸︰「套戲劇情要我摸阿佘個胸，嗰時我超尷尬，要摸視后個胸喎！最後我冇摸到，惟有借位啦！阿佘就用雙手放落件衫度，我只係揸佢個拳頭，已經覺得好大壓力。」