性感心悠肩拚飄逸小S

夏日炎炎，不少女星愛以飄逸Look示人，名模莊思敏（Jacquelin）建議大家揀裙時，Low Cut裙可配上頸飾，碎花裙則要選有Platform的鞋。她更大讚露肩的徐熙娣（小S）着出夏日的飄逸氣息，劉心悠的斜肩裙則修長性感！

小S清爽涼快

莊思敏：「白色係夏天嘅大熱顏色，同今季嘅熱浪氣息非常配合，襯晒佢爽朗嘅性格！長裙感覺一啲都唔重，反而有種飄逸感，睇上去好涼快！」

評分：8分（最高10分）

劉心悠內斂修長

莊思敏：「黑裙絕對係穩陣嘅選擇！性感嘅斜肩設計加咗唔少分，及膝裙穗令心悠睇上去更修長，有份內斂感，佢Carry得好好！」

評分：7分

泳兒安全之選

莊思敏：「簡單嘅One Piece感覺安全，配合到泳兒清秀嘅身形，如果條頸加埋少量飾物，就會更突出本身嘅美態！」

評分：6分

江若琳牛女好焗

莊思敏：「個花其實幾好，不過牛仔布做背心，感覺太熱唔太似夏天，整體睇上去好焗！選擇深色啲嘅背心都可以！」

評分：4分

周秀娜出手太「重」

莊思敏：「條裙冇問題，佢Carry到有餘！不過裙身立體嘅Layer設計同頸飾有啲撞，整體感覺重咗啲！」

評分：6分

林欣彤格格不入

莊思敏：「黑色Leggings破壞咗成個Look，同佢件淺色衫撞晒Tone，整體感覺有啲突兀，浪費咗鮮色嘅部分！」

評分：3分

徐子珊唔長唔短

莊思敏：「子珊揀錯裙！條裙唔長唔短老土咗啲，深色背心錯晒！建議佢揀啲鮮色淺色背心，個人會後生啲！」

評分：3分

梁雨恩毛毛累事

莊思敏：「條裙個Cutting好好，不過裙身有毛嘅設計熱咗啲，同夏日氣息唔太夾！短裙長度啱啱好，凸顯修長嘅美腿！」

評分：5分

羽翹Tone殺風景

莊思敏：「條裙睇上去普普通通，浪費咗清爽簡潔嘅髮型！碎花裙應該感覺清爽，不過個花嘅Tone太沉，唔夠夏天！」

評分：3分

Profile：名模撈過界

莊思敏（Jacquelin）擔任模特兒多年，經常擔任品牌代言人，時裝觸覺敏銳！她不但躋身名模行列，近年更成功殺入影圈。