多「仔」婆(3)許亦妮遭群杯

今屆港姐大熱(3)許亦妮是非一大籮，在台北拍外景亦被其他佳麗玩群杯，但她一於少理，嘴藐藐擺甫士畀傳媒影獨照！

今年港姐繼續多是非，「D Cup GiGi」許亦妮樣子標青，加上昨日公布十四位佳麗的三圍數字，她以35吋上圍領「峰」騷，而屢傳她(界)有錢仔成傳媒焦點，難怪惹其他佳麗眼紅。

儘管港姐已飛到台灣拍外景，但明顯已出現「小圈子」。表面上十四位佳麗在傳媒前笑騎騎，但鏡頭後，許亦妮明顯變獨孤精。港姐昨日到北投溫泉公園取景，大合照時，許亦妮一度被其他佳麗擠到大邊疆，她則一臉懶理，對着其他佳麗時不時嘴藐藐。

其他佳麗受訪時，亦一人一把嘴暗寸許亦妮感情生活亂，其中身為她勁敵的「國產周麗淇」(5)朱晨麗自信十足，揚言不感到風頭被蓋過，談到有傳許亦妮有逾十位男友，她即句句有骨：「我就冇喇！我係有拍拖，但感情好穩定囉！」而來自英國的M蔡慧欣則說：「冇睇報道呀！唔識睇中文！佢嘅事唔關我事！」

自稱多人撐

問許亦妮會否擔心惹其他佳麗嫉妒？她竟說：「唔會！大家都好支持我！」她直認曾與楊受成姪兒楊嘉杰拍拖，但否認見家長後被棒打，並說：「同男仔合照好正常，唔覺負面囉！」並澄清沒有11位男友。