吳卓羲唔畀「麵」避咀子珊

曾傳緋聞又以兄弟相稱的吳卓羲（Ron）和徐子珊，昨日谷劇玩啜麵遊戲時，Ron竟不願啜到子珊而自斷麵條，認真唔畀面！子珊則大方表示願意情侶檔搵銀。

徐子珊、Ron、郭晉安、汪琳和羅仲謙等昨日宣傳新劇《團圓》。曾傳緋聞的Ron和子珊雖同場卻未有尷尬，但當玩面對面啜麵遊戲時，Ron為免啜到尾會啜到子珊，竟中途自斷麵條，因而被要求玩多次，但兩人無緣「咀嘴」！事後記者笑Ron寧願夾斷麵條，也不肯讓子珊咀，他說：「唔係，係條麵好韌，唔想尷尬，斷咗方便啲大家食到。（驚太親密？）我冇諗到咁複雜。」而Ron日前拍攝新劇《反恐ATF》時，因從高處跳下觸及舊患，拉傷韌帶，行路有點一拐一拐。他透露尚有很多動作戲要拍，故會跟武術指導溝通，希望將難度降低，令他可親自上陣，增加可觀性。

願情侶檔搵銀

相反子珊大方表示願與Ron情侶檔搵銀：「之前忙拍劇，錯失咗拍兩部電影同好多搵錢活動，損失近七位數，希望今次趁呢個劇可以做番多啲，同吳卓羲情侶檔都冇所謂，遲啲都再合作拍新劇。」

至於郭晉安太太歐倩怡預產期是下月初，故安仔近日盡量留港陪伴，並稱早已預留床位給太太分娩。而懷孕四個半月的汪琳透露，預產期在11月：「BB雙腳夾實，未知仔定女，仔女都冇所謂啦！（自然生？）都想試吓，但有啲驚，仲考慮緊。（預留咗床位？）留咗喇！醫生話香港人唔使擔心。」