傅穎爆閨房樂

傅穎（Theresa）去年拍住「情色攝影師」米原康正影寫真，更破天荒大膽裸背，僅以雙手遮胸鬥模，但這位「性感尤物」今年將回歸平淡，以雜誌形式出新書，她說：「覺得係時候停一停，做啲從來冇做過嘅嘢，做一本雜誌出嚟比較新鮮，依家開始明白記者嘅苦況！」喜愛繪畫的Theresa亦會在書中分享畫作，為了趕書更在5日畫了80幅畫：「之前我出啲書多數係有畫有字，用呢個方式都出咗好幾年，我希望嚟緊可以定期出書，唔只喺書展先出，所以一有時間就要喺屋企預備。」今次她又搶飲頭啖湯，率先在本月底在書局舉行預售簽名會搶客！

宅女愛洗碗

Theresa更公開「閨房樂」引宅男，將家中沖涼、護膚用品及衫褲鞋襪等統統影一餐，將自己的私生活毫無保留地呈現讀者眼前：「其中有部分講家居布置，一定要影屋企環境全貌。（驚唔驚公開晒啲私人嘢？）都唔擔心，主要係想同人分享吓自己屋企有乜。」別看她外表潮爆，其實隱藏在內心深處的是一個「宅」到不能的宅女：「咁大個人都淨係成日喺屋企，我又唔係上網上到好毒嗰啲，只係忙住做家務，好似洗衫、洗碗、執屋、洗廁所咁，同埋玩屋企嗰五隻熊仔鼠！」

患愛情絕症

日前有指其家姐特地做紅娘介紹筍盤給她，Theresa坦言純粹參加，暫時無心拍拖，徹底封閉愛情世界：「我成日好想有個好好嘅男仔，好好嘅感情，一齊之後有美好嘅結局，我諗得太美好喇！但現實歸現實，現代男女脫離咗呢樣嘢好耐，依家出面你係咪見到個個都一對一？而且有好多人都離婚。」對她來說，男仔最緊要專一，奈何這些男仔早已絕種，令她斷言已患「愛情絕症」冇得醫，惟有寄情工作，北上大展拳腳！

原來北上發展一直是Theresa的心願：「我諗全香港嘅藝人都想北上發展，入咗行9年，出年就10年，係時候向外闖，內地都有固定粉絲，廣東沿岸多啲，去到北京就唔係好多人識，要逐步逐步嚟，到時就好似新人咁，要周圍去Casting！」出書後，她會先到北京視察居住環境，現時要狂練普通話：「去到會繼續做電影、劇集嘅嘢，到時會將重心放喺北京，但唔會完全斷晒香港嘅嘢，有工作都會返嚟做。」她已定下長遠目標，全力搵人仔！

我眼中的黃婉曼：率直敢言

我知道佢之前係報道天氣，依家成日喺電視節目都見到佢，覺得佢係個敢作敢言嘅女仔，但就冇睇過佢啲專欄，知佢鍾意寫有關愛情嘅散文，咁啱今次我本書都係圍繞愛情呢個主題！大家到時可以互相交流吓！

前世禁慾 來生做型男？

傅穎特別找來「密宗金剛上師」陳果齊兒子陳定邦講她的前世及來生，再輯錄入書中：「佢話我前世係女藝術家，到年老斷絕七情六慾，有 啲似我依家嘅性格；至於來生就係個體格魁梧嘅氣質型男，變咗男人都幾好，其實我內在唔係好女仔，係個男仔頭！」