黃婉曼教追女仔

宅男是很易氹的動物，黃婉曼和傅穎就是成功慰藉他們的佼佼者，她們從不需Chok事業線上下巴，竟輕易成為宅男女神，原來致勝之道在於捉心理。如今兩女與　模在書展鍊過，一個教宅男追女，另一個則大爆「閨房樂」！

雖然黃婉曼（Icy）曾被嘲「豬扒」，但自從她以「天氣小姐」亮相幕前，直至現在主持遊戲節目，宅男粉絲數目一路攀升，單看討論區有她名字的題目數量，便知道她成功進身「宅男女神」！早前出書自我解構兼送密照的Icy，將再度出書發功，教宅男追女仔！

宅男普遍愛漫畫、索女寫真，要氹他們掏荷包買擠滿文字的愛情書，Icy自有妙計，切忌女權當道，實行男女有Say：「我唔會淨係寫自己嘅愛情觀，會寫男女對同一件事嘅唔同睇法，覺得會幾特別！呢排我密密睇愛情戲同聽歌搵靈感。」憑報天氣出名的她，講愛情亦不忘向季節致敬：「前排雨季，我就想寫啲失戀嘅嘢；我覺得愛情最好喺冬天開始，聖誕節畀我感覺開心又幸福，空氣中充滿住愛情嘅味道。」

愛情觀灰爆

Icy與任職會計師樓的男友F君甜蜜蜜，對方自然成為她資料搜集就地取材的目標，她笑說：「佢都有畀啲特別意見啟發到我，佢仲話要收我版權費添！」唔講唔覺，原來經常笑臉迎人的她在愛情上是「悲觀底」，默默期待另一半扭轉睇法：「我愛情觀好灰，希望寫完本書可以搵到幸福嘅秘訣。覺得愛情係傷害多過甜蜜，我唔敢太天真去睇呢樣嘢，唔少人一開始愛到死，但好結局有幾多吖！幸福係要努力經營、係一場賭博，依家我唔敢講幸福係咩，可能到人生終結嗰刻先知。」雖與男友拍拖不久，但兩人已見家長，Icy自言「超級幸福」，但問到是否認定對方為終身對象，她口窒窒說：「都係咁諗，想同佢步入另一個階段，但未到最後一刻都未知住。」

做藝人空虛

正式轉型做藝人僅幾個月，Icy認為經歷已夠Dramatic（戲劇性），她無奈地說：「爆粗、同洪永城傳緋聞，拍拖都上到頭版！面對批評係唔慣，都要一段時間先適應同接受到。有段時間好大壓力，忙到覺得空虛、好難捱，諗過不如做番記者打份工，但諗起有呢個機會好難，有好多人努力十幾年都唔得，惟有抖一抖再衝刺！」至於未來路向，她自認不是大想頭的人，唱歌、拍戲、拍劇統統冇諗，只求安於本分，做好《撳錢》主持：「我未做得好，農夫、Keyman做得好好，有唔同主持風格，都開始搵到自己嘅風格，我想每一晚同觀眾分享一啲佢哋唔知嘅嘢，我諗係知識型主持啩！」

我眼中的傅穎：努力嘗試

我對佢嘅書冇乜了解，但係印象中佢係一個好努力嘅藝人，好肯嘗試唔同嘅路向去發展。對佢本新書都有少少興趣，如果行開書局睇到見得意，都會買嚟睇吓！

自信爆棚變靚啲！

每次見Icy，身邊都有化妝師及髮型師傍住打點，她笑說：「未入行前，我毫無粉飾，依家身邊有人照顧形象，變得靚靚，欣賞自己多啲，自信咗！以前傻更更唔識打扮，乜衫都唔敢着，依家嘗試多咗，覺得只要適合嘅都可以好靚，見到更多唔同嘅自己！」